以前中學年代，每逢上電腦堂或者去圖書館都總有好多人鐘意玩一類 Flash 或者 Java 的網頁遊戲，因為貪其唔使安裝上網即玩。而家已經全面進入智能手機及 5G 網絡年代，網頁遊戲已近乎絕跡。現時隨住 5G 普及，新興嘅雲端遊戲正處於爆發期。科技界巨頭 Google 及 Apple 都推出咗雲遊戲平台，而香港方面，電訊公司 CMHK 日前亦都剛推出咗 UGame 平台，效果如何？我地來試一試！
雲端遊戲嘅優勢正是「免下載」、「免安裝」，而且亦無須擔心裝置的處理器能力，只要一部手機或其他裝置就可以透過網絡連線暢玩無限量嘅遊戲。不過大家都知，如果要以串流方式玩遊戲嘅話，當中有兩個問題必定要解決，一是網絡速度頻寬，一是網絡與伺服器之間的 Ping Time 反應時間，要暢玩的話兩者真係缺一不可。
網絡速度及時延反應時間，正正是 5G 嘅優勢，現時隨住 5G 普及，雲端遊戲平台正好發揮其作用。CMHK 嘅 UGame 平台推出後，我地亦都隨即進行了測試：
▲ UGame 平台現時主要收錄了一系列經典街機遊戲，相信作為 80,90 後的讀者一定不會陌生。當中包括 Metal Slug、The King Of Fighter、LEGO Harry Potter 等涵蓋動作、冒險、格鬥、休閒等合共八大種類。據官方資料，現時已上架的雲遊戲已達 80 款，預計目標年底增加至 100 款以上。
▲ 想玩遊戲，當然要付出。該平台主要以訂閱方式進行，一個月包月會員費用為 HK$78，想長玩的話亦可以考慮 12 個月甚至最多 24 個月。現時如果申請指定 5G Plan 都會送 VIP 月費免費玩，例如申請 100GB Plan 就送 6 個月，200GB Plan 送 12 個月，最多去到 300GB Plan 送 24 個月。
▲ 訂閱服務後就可以隨時隨地透過網絡暢玩所有遊戲，喺街外可以用數據玩，而喺室內亦可以透過 WiFi 連接。遊戲提供咗虛擬按鍵操作介面，對於一眾 Game 迷來講相當熟悉。除咗虛擬觸控鍵之外，亦都支援 Xbox、PS4 等手制進行遊戲。另外，UGame 雖然係手機 App，但想要投放到電視機大畫面玩都得，可以配合 CMHK 推出嘅 UTV Box 使用。
▲ 以 CMHK 5G 網絡作測試，遊戲進行時右上角可以睇到伺服器反應時間，測試所見 5G 網絡環境之下可維持在 1x ms 至 2x ms 之間，操作時十分順暢，就算玩格鬥類遊戲都唔會 Lag。
▲ 再試用 4G 網絡，反應時間明顯下降，只能維持在 4x ms 至 5x ms 之間，不時會出現 Lag 機現象。
▲ 如在室內 Wi-Fi 環境之下，反應時間更可在 10ms 或以下，試玩 WRC 4 FIA World Rally Championship 十分流暢，畫質亦不錯
以下一段喺 CMHK 5G 網絡環境之下(位置：觀塘地鐵站月台) 簡短試玩影片，大家可以留意一下右上角的伺服器反應時間，畫面操作上可見到動作及特效都十分之流暢，畫質亦可保持不會起格：
總結：
隨住 5G 服務正式投入，可見越來越多相關應用服務得以發揮出更高質水平。雲端遊戲正是未來一個大趨勢，就算是 Google 推出的 Stadia，Google 都承認過網絡延遲是最大痛點。如今試玩過 CMHK 推出的 UGame 後，已經可以體驗到雲端遊戲所帶來嘅優勢。雖然，現階段要街外任何位置都可以隨時暢玩有點困難，始終要求網絡可完整覆蓋到的地方。現時 CMHK 嘅 5G 覆蓋已經算是舖設得唔錯，室外大部分位置都可以接收到 5G 訊號而且速度夠快，玩起上來已經有唔錯嘅體驗。
