上個月月頭，誠哥旗下嘅百佳超市聯同 3HK Soft Launch 咗一張「窮L救星」儲值卡SoSIM，初期只限旗下指定 10 間百佳 (或旗下副品牌) 超市發售。張卡一出瘋摩全港窮 L 學生哥界與及姐姐界，每次返貨都被人掃晒。而今日 3HK 就宣佈，SoSIM 現已於逾 250 間百佳或旗下副品牌超市有售。
SoSIM 玩法好簡單直接，張卡就係一張儲值卡，賣 $33 蚊用 30 日，有號碼裡面包 10,000 分鐘通話時間，而且仲有 50GB 4G 42Mbps 數據，其後限速至 128Kbps 無限任用。
除咗本身 50GB 4G 42Mbps 數據外，啟動張卡仲有再送三項優惠，包括額外 50GB 社交數據 (可用於 Facebook、Instagram、WhatsApp、LINE、WeChat)，另外每日 11pm-7am 仲有無限任用數據 (最高 7.2Mbps)。以及，10 倍易賞錢積分獎賞。
▲ 自助收銀機撳下最右上角個增值制就可以一步步跟住增值。
張卡賣 $33 用 30 日，如果想繼續用嘅就可以 Keep 住增值，每個月重新扣 $33 就有多 50GB 4G 42Mbps 數據俾你繼續用。而家增值都方便，可以去百佳收銀櫃枱同 EE 講，或者自己行去門口自助付款機度自己增值都得。
▲ 最少增值額係 $20，可以幫張卡延長多 30 日 (有限期)，之但係 $20 並唔夠用來開多一個月 50GB 數據用，所以你需要再增值到夠佢每個月扣一次 $33 蚊先得。
不過，如果要計最抵玩就係每個月去買一張實體卡，咁樣就會多返果幾項開卡優惠，但缺點當然係比較麻煩同埋個號碼會每張卡都唔同。如果你買呢張卡只係諗住用來插落 SIM 2 卡槽度專燒 Data 用，而你又唔介意每個月去買一張咁就 Go 啦 (環保？算啦，當有著數喺你面前，你係唔會理架啦，人少少認咗佢啦）。
全線逾 250 間百佳超市及旗下副品牌包括：Fusion、Taste、International、food Ie parc、Gourmet、Great Food Hall 及 Su-Pa-De-Pa。
