講咗好耐嘅 5G 終於喺 4 月 1 日零時零分起正式啟動，礙於初期推出相信大家都擔心覆蓋範圍以及速度等會如何。所以我地亦都走均多個地點為大家進行測試，而家就等 Winson 帶大家睇睇。
現時香港幾間電訊商，包括 HKT、CMHK、3HK 等都陸續公佈咗 5G 上網計劃收費，而日前 Winson 亦都收到了 CSL 嘅測試 SIM，所以就拎埋部 Samsung Galaxy S20 Ultra 去咗幾個地點為大家測試 5G 速度。
據 CSL 資料，現時唔少旺區嘅室外以及商場室內等都已經有 5G 訊號覆蓋，包括銅鑼灣、灣仔、金鐘、中環、上環、尖沙咀、佐敦、油麻地、旺角、紅磡及土瓜灣；指定 14 家 csl 及 1O1O 專門店；主要基礎設施如香港國際機場；大型商場包括太古城中心、海港城、國際廣場、K11 購物藝術館、K11 MUSEA、MegaBox、美麗華廣場及太古廣場等。
首先來到旺角西洋菜街，我地先由近登打士街果邊嘅兆萬開始，因為呢頭有間 CSL 旗艦店，然後再向新之城方向行上去，睇下呢頭附近訊號覆蓋效果如果。結果如上影片所見，速度表現極為理想。
兆萬門口由測試網站 fast.com 完成下載 2GB 檔案速度達到 790Mbps，而當中最值得大家關注嘅仲有網絡時延(Latency) 只有 10ms，呢個成績拍得住家中 1,000Mbps 嘅光纖寬頻表現。
然後再向上去地鐵站銀行中心出口，速度亦達到 450Mbps。最後再到新之城對出十字路口位置，雖然速度稍有下降，但亦達到 370Mbps。相比起 4.5G 嘅全速，可以見到 5G 嘅速度可以提升數倍。
試完旺角我地再轉場到尖沙咀：
▲ 入到美麗華商店，試到室內速度都有 420Mbps
▲ 加拿芬道 450Mbps
▲ 廣東道 490Mbps
▲ 天星碼頭 290Mbps
試完尖沙咀我地再搭小輪過海到中環及銅鑼灣：
▲ 搭船過海期間全程都收到 5G 訊號
▲ 中環 IFC 330Mbps
▲ 銅鑼灣時代廣場 630Mbps
總結：
經過一輪室外室內測試後，5G 初階級推出嘅覆蓋範圍其實已經比起 Winson 預期中高，今次所試嘅 CSL 表現相當唔錯，由旺角至到尖沙咀地面無斷過訊號，連由尖沙咀過海去到中環碼頭都無斷過。可以見到，現時九龍以及香港黃金地段旺區都有 5G 覆蓋，地鐵範圍就會回落到 4.5G。呢層其實又無可厚非嘅，首階段先做好地面室內外覆蓋其實已唔錯。地鐵範圍亦都正如 CSL 新聞稿所講，佢地來緊都會舖設。
總括一句，今次 CSL 5G 嘅初體驗，畀 Winson 嘅感覺就有如隨身帶住 1,000M 光纖寬頻出街一樣，速度以至網絡時延都非常之快。
