3) 利用前景，拍出層次
構圖亦係相當重要嘅一環，如果下下影大頭根本唔知去過邊度。特別係去旅行，風景梗係更重要啦！除咗人要細，景要多之外，適當咁運用前景，就更容易令自己融入環境入面，一睇就知唔係 Key 上去嘛！
至於前景係咩？我諗大部份人都會諗起利用水氹，拍出天空之鏡嘅效果。另外，亦可以用花作前景，拍出置身花海嘅感覺。
▲ 早排興去下白泥、西環、中大天人合一搵天空之鏡。其實天空之鏡唔使四圍搵，只要地下有攤水，張相機放得有咁貼得咁貼地面就可以影到。不過因為裝咗腳架都會有一定高度，除非你想犧牲部相機，否則都難有天地一線嘅效果。
▲ 運用前景，改變對焦亦可以營造唔同嘅氣氛。
▲ 用花做前景，以水平角度影，就算並唔係喺花嘅正中間，都可以有置身花海嘅感覺。
▲ 用花作前景、城堡作後景，亦可以係有趣嘅構圖。
