Hi-Res 音樂近年大行其道，連手機牌子都要以此作為賣點，由最早引入 Hi-Res 支援的 Sony 到最近的新機 LG V20，都以 Hi-Res 標榜其產品音色係如何比對手優勝。當「音樂手機」呢個概念再次受到重視，係 Hi-Res 領域上耕耘左好一段時間的日系音響大廠 Onkyo 都不甘後人，將 DAP 同手機結合，推出第一款音樂手機 GRANBEAT DP-CMX1。
先講「手機」方面的規格，GRANBEAT DP-CMX1 用上 5 吋 FHD 解像度 IPS 芒，處理器係 Qualcomm S650 六核心配 3GB RAM，內置容量就有 128GB。相機方面， GRANBEAT 用左 Sony IMX298 1600 萬像素 F2.0 光圈鏡頭，前鏡就有 800 萬像素 F2.2 光圈鏡頭，電量方面有 3000mAh 支援 Qualcomm Quick Charge 3.0 快充，使用 Android 6.0 系統。
單純以手機規格來看待 GRANBEAT DP-CMX1，自然會得出「不過是一部普通中低階手機」的結論。但 GRANBEAT 賣點，在於其「DAP」的一面，以規格而言，並非現時市面上的手機可比的，內置兩枚 ES9018C2M DAC 晶片，兩枚 SABRE 9601K 耳擴晶片。最高支援 24bit/384kHz PCM、支援 aptX HD 藍牙傳輸，同時有 Micro USB 、 3.5mm 及2.5mm 耳機輸出。價錢方面，售價大約為 84800 日元，二月下旬日本正式開賣。 Onkyo 今次無疑係一個大膽嘅嘗試，將 DAP 結合手機意味著可以取悅唔少音樂發燒友的同時，亦可能因為外型較為笨重，嚇怕唔少用家，唔知你又點睇？
