由國際足協舉辦的普斯卡斯獎而家可以投票啦！今年由國際足協選出的最後十強候選人之中，最多人識當然係美斯同尼馬，但係最佳入球係計觀賞價值而非名氣，邊個贏到主要都係靠你嘅一票
獲得提名嘅十大候選人，五湖四海到到都有，當中美斯就以今年美洲國家盃對美國嘅死角自由球入圍，而尼馬就係巴塞對戰維拉利爾一個精彩的罰球入選。十名候選人分別有：
- Mario Gaspar（西班牙）
- Hlompho Kekana（南非）
- Marlone（巴西）
- Lionel Messi（阿根延）
- Neymar（巴西）
- Saúl Ñíguez（西班牙）
- Hal Robson-Kanu（威爾斯）
- Daniuska Rodríguez（委內瑞拉）
- Simon Skrabb（芬蘭）
- Mohd Faiz Subri（馬來西亞）
當中可以見到，除左候選人國籍遍佈 4 大洲，仲有女性球員（Daniuska Rodríguez），對於對足球不太熟悉嘅朋友，或者都會好奇到底普斯卡斯獎是咩來頭。
其實呢個國際足協頒發的獎項，係 09 年設立，以傳奇匈牙利球皇普斯卡斯命名。獎項會由國際足協搜集全年最精彩嘅十個入球，再上傳到 Fifa.com ，供全球球迷投票。入選標準不論男、女子足球，賽事性質或者入球球隊亦唔係重點，入球嘅觀賞價值先係最緊要（但入球不能靠運氣或者由對方球員失誤所做成）。獎項除左會有女性足球員競逐，更加有來自次級組別聯賽球員贏到獎項嘅先例（好似上年就由巴西丙組隊戈亞尼恩斯的前鋒利華得獎）。
而有趣嘅係，雖然獎項以皇馬名宿命名，現役都有兩名球員係獎項得主（C朗同占士洛迪古斯），但就未有皇馬球員係效力期間獲獎，而同樣巴塞嘅美斯雖然有亦曾獲提名，但一樣未拎過。至於筆者個人心水就係馬體會沙奧尼古斯（Saúl Ñíguez）對拜仁歐聯入果球，當時睇直播真係驚呆鳥⋯⋯以下係影片重溫同 Fifa 投票連結，睇完片大家快快投票啦，到 12 月就截止啦！
