假如你對靚靚波鞋一買返去就發現，鞋上面竟然有屎！你會點做？
正常反應梗係狗衝抺咗佢，何況而家波鞋潮流越炒越熱，個價越炒越貴。
唔少人買咗返去都唔捨得著，驚整污糟，影響收藏價值。唔好講話屎，塵都唔想有一粒啦。
但係復古潮牌Golden Goose就偏偏相反，對對自帶污蹟，要有咁舊得咁舊，直頭踩屎咁！
直頭放喺屋企門口都唔使驚有人偷！
以為對鞋污糟就會好平？咁就錯晒，圖中宋仲基著緊哩對Golden Goose Deluxe Brand Super Star系列款式，一對盛惠$3000，仲要男裝己經無貨啦。
你可能心諗，想對鞋污糟容乜易，做乜要俾錢買？當然有原因啦，跟根據Golden Goose嘅發言人Flaminia D’Onofrio話，佢地嘅波鞋好多都係用意大利最好嘅皮做，確保一定著得舒服。而鞋上面嘅「屎」並唔係真嘅屎，而係全部由威尼斯嘅工匠人手加工落去，所以對對都係獨一無二㗎！
除咗上面宋仲基，仲有好多中外明星係佢fans。
就咁睇落，Golden Goose會有少少Converse嘅影子。因為佢地最暢銷嘅super star系列，鞋身都有粒星星喺度。但係仔細睇，佢地嘅星星全部都係大大粒，同埋通常都係無咁隻角。同Converse嘅星星好大分別。仲有就係粒星星嘅材質有牛皮，有麂皮，有啲好似天星小輪啲椅咁，係一個個洞組成。
