往年慣常於 9 月發佈嘅 iPhone,今年可能受到全球疫情影響而推延至 10 月發佈。今日,終於都正式落街發售。以往出新 iPhone 大家話題都離唔開有冇得炒,不過近年炒風已經好快消失,多咗人買到機總算大家都開心啦!

一如往年,開售第一日我地都去到 Apple Store 現場睇睇情況。今早 IFC 嘅 Apple Store 喺早上 8 點正式開門前,門口都有訂咗機嘅果粉排隊,不過現場所見人龍就並唔長,而買機嘅都係以 iPhone 12 Pro 為主。

Apple 喺月中線上發佈會公佈咗 iPhone 12 系列,隨後喺上星期五開啟預售,而今日就正式公開發售。今年 iPhone 型號多達 4 款,相信好多人都心大心細唔知點揀好。而 Apple 今次就特別先安排兩款機身同樣尺寸嘅 iPhone 12 同 iPhone 12 Pro 率先發售,而 mini 同 Pro Max 就要等到 11 月 6 號先開始預購。

ifc 的 Apple Store 旗艦店有三層,平日開門時間係早上 10 時正,而每年 iPhone 首賣日喺頂層都會提前至 8 時正開門,以迎接首批喺預購日成功買到 iPhone 嘅果粉。由現場所見,相信第一批排隊買嘅都係「真用家」,因為近兩年開售日附近都唔見有收機人士了。

入場買機時在場職員會即場幫忙啟動 iPhone,現場所見人流並唔太密集,可保持社交距離。

而喺 Apple Store 另一邊仲有 SmarTone 門市,現場都有首批買機人士到門市攞機,我地都一齊過去睇睇。

來到 SmarTone 門市我地見到一張熟悉嘅面孔,曾先生係 SmarTone 長期客戶,近幾年來都係透過 Red Pass 登記預購新 iPhone,而今年佢又成功搶到做首賣日第一名出 iPhone 嘅顧客。

▲ 今次曾生買咗一部 iPhone 12 Pro 512GB 太平洋藍色,職員即場幫佢開機設定。

▲ 第二位買機仁兄係陳生,佢幫屋企人出咗兩部 iPhone 12,分別係 128GB 藍色 同 白色。

做首兩名買家有冇 So?緊係有!除咗可以畀記者影相上報之外,仲有額外野送。今次 SmarTone 就向兩位顧客送咗 iPhone12 精選配件套裝,包括手機保護殼、屏幕保護貼和精選手機配件(價值$388)。

即刻睇我地嘅 iPhone 12/12 Pro 深入評測

如何想了解 SmarTone 嘅 iPhone 12 相關 Plan 嘅話,可以睇睇我地之前嘅報導:

SmarTone 推出 iPhone 12 5G Plan:新月費 35GB 數據 $308!

_______

更多平台立即 Follow:Qooah IG (@qooah)Qooah YouTube,八掛產品發佈會現場,睇盡靚靚 Show Girls