幾時先可以直接將八達通加入 iPhone 或者 Apple Watch 度？呢個問題，大家已經問咗幾年。雖然，上年八達通已經宣佈 iPhone 及 Apple Watch 將可當八達通用，之但係隨後又再一次延期。等等下又過咗一年，咁幾時先用得呢？近日八達通網站更改咗部份服務條款內容，睇來今次真係就快畀大家等到了。
近日有網友發現，八達通官方網頁上嘅「顧客重要提示」，內容已經有所更改。當中加入咗 Apple Pay 相關嘅條款細則，包括將實體八達通轉移至 Apple Pay 內有咩限制，有咩優惠會跟隨一齊轉過去等等。
而重要嘅係，原本「使用八達通的收費項目及指引附表（「附表」）」嘅生效日期已經改為「自2020年5月20日起生效」。由此推斷，八達通公司已經隨時準備推出呢個服務，而最有機會嘅啟用日期就係下星期三 5 月 20 號 。
