離開機場前必須搞掂的 5 件事

寫完兩篇 賞櫻熱點 同 櫻花小食 之後,開始番今次東京之旅遊記嘅第一步 – 落機。買平機票嘅關係,我 依莉詩 今次就係去到好盡,凌晨機去凌晨機返,名副其實玩足 8日 full day。亦因為咁,所以到達羽田機場只係清晨 5點,不過係乜都未開嘅情況下,我哋就有更多時間為旅程做好準備啦!

去慣旅行都知道,落機拎晒行李後唔好咁急出發住,有幾樣嘢都要準備好先可以令旅程更順利,就係兌錢、買車飛、寄行李同買上網卡。通常呢啲都可以係機場搞掂晒。

1) 兌錢預備現金

雖然東京好多地方都用到銀聯同 VISA,不過都係準備定現金較穩陣。如果搭凌晨機,到達會因為太早,兌換店未開門,所以大家可以係一出大堂左手面搵到 ATM,當然都要出發前開通咗海外提款服務先得啦!而今次我哋係匯率低嘅時候已經係香港兌好晒錢,所以就可以完全  skip 呢 part。

▲ 一出大堂左手面就有 ATM。

2)  買 PASMO卡方便搭車

有現金就要開始買嘢,最先就係要買張類似八達通嘅 PASMO卡 方便搭車同自動售價機用,建議買不記名PASMO卡,不需證明文件即可輕鬆購買。另外,如果行程主要都係東京市區內活動,可以購買 24小時、48小時、72小時的 Tokyo Subway ,無限次係東京 Metro 地鐵全線以及都營地鐵線全線使用,一日去多個地方就去啱用。呢兩張卡都可以係大堂右手面的 24小時觀光資訊中心搵到,入面仲可以買到主題樂園門票等等,可以一站式搞掂。

圖片來源:https://www.gotokyo.org/tc/tourists/info/center/

▲ 2樓不算大,其實都好影搵,可以睇睇觀光資訊中心位置圖。

圖片來源:http://www.pasmo.co.jp/tc/buy/

▲ 如果怕排長龍可以去自助售賣機買,購買方法可以去 Pasmo 官網

圖片來源:http://www.tokyometro.jp/tcn/ticket/value/travel/

▲ 去過東京嘅人都會話車費特別貴,所以都係買張 Tokyo Subway 比較好,3日全搭都係 1,500日元。如果去遠少少都差唔多 400日元一程,所以都幾抵玩。

 

3) 寄行李直送酒店

因為第一日行程決定去橫檳,但酒店就係人形町,無理由為咗啲行李晒兩個鐘來回㗎嘛!所以我一早就打算寄行李去酒店。機場右手面就有多間公司的 24小時行李寄送櫃位,一般黎講,如果同區今日寄出明天早上就會收到。但如果 6點就寄行李,就可以即日送到酒店。如果擔心寄唔切都可以先問一問職員或者 keep 住一日衫褲先寄嘅。至於幾錢就要睇公司、寄邊區同行李尺寸而定,收費可以參考空港宅急便網站。畀百幾蚊就可以唔使搬行李,即刻出發真係唔錯㗎!

圖片來源:http://www.kuronekoyamato.co.jp/tcn/personal/airport/

▲係觀光資訊中心行入少少就會見到多間公司的 24小時行李寄送櫃位

圖片來源:http://www.jnto.go.jp/hands-free-travel/common/pdf/hands-free_travel_support.pdf

▲ 以上係 YAMATO 的 Sample,如果唔識填可請職員代勞,他們會有中文翻釋的示範給你。

4) 搭車必用 App

香港得一間地鐵公司,而且架架車都站站停,基本上點都去到,但東京單單地鐵已經 9 條 Metro 同4 條都營線路,合計 13條線路,仲要與 JR 鐵路交織。加上轉乘的車並非站站停,所以我強烈建議第一次去東京的朋友一定要下載 Yahoo!乗換案内 ( iOS 版下載 / Android 版下載),否則真係迷失地下鐵。

▲ 東京的地鐵跟車站錯綜複雜,加上班次並非站站停,所以齋睇幅圖隨時搭錯車或坐過龍。

▲ 所以每次搭車前最好先查一查由 Yahoo! Japan 推出的轉乘 App ,找出最快速、最簡單、最便宜的方式到達目的地。如果買咗 Tokyo Subway ,亦可以避開包含 JR 的路線,減少額外車費。

5) 買上網卡 或 租 Wi-Fi 蛋

對於依家無得上網會死的時代,一落機又點可以無得上網,唔少人都會有疑問,到底出遊應該買上網 SIM 卡好,還是租 Wi-Fi 蛋好?係香港買定到機場再搞好?其實都有幾多方案下。

1. 買旅遊 SIM 卡

講到買 SIM卡,唔少人都會去深水埗鴨寮街購買,售價相當便宜,大約 HK$80~150 就有交易。不過一分錢一分貨,大部份都係經過重新包裝的 SIM卡,質量難有保證。

亦可以選擇係日本當地購買上網 SIM 卡賣,機場的自動販賣機有 7 日及 14 日兩款,大約由 HK$200 – $350,而羽田機場左手面亦有 BIC CAMERA 機場店,有好幾款上網 SIM 卡選擇。

好處:插卡即用、避免意外收取漫遊費、不用歸還

壞處:要換卡、更換電話號碼、

注意事項:留意上網速度、使用流量、使用日數、會否限速、可否分享到其他裝置、能否通話

2· 數據漫遊日費計劃

依家唔少網絡商都有數據漫遊日費計劃,只要上網撳幾個掣就可以申請,方便之餘,唔會換電話號碼,適合公務繁忙嘅大忙人。數據漫遊一般都係以日計算,日費由 HK$68 至 HK$198 都有,收費比買上網 SIM 卡貴。各大電訊商數據漫遊日費計劃收費可參考:SmarToneCMHKCSL

好處:唔使換卡、唔使換電話號碼、不用歸還

壞處:有機會產生不必要漫遊費用、不能分享給其他人、比起買上網 SIM 卡貴

注意事項:留意上網速度、使用流量、使用日數

3. 租 Wi-Fi 蛋

如果一一大班朋友去日本,租 Wi-Fi 蛋就可以開心 share,唔使個個買上網 SIM 卡,係香港租大約 HK$28 -60 一日,係日本租都係 HK$40,多人的話除開會平好多。

好處:唔使換卡、多人分享

壞處:要歸還、上網不穩定、遠離 Wi-Fi 蛋就上不到網

注意事項:留意上網速度、使用流量、使用日數、可分享裝置數目、會否限速

4. 成田機場免費拎 SIM 卡

如果飛成田機場的話,可以去第 1、2、3客 運大樓免費領取一張數據 SIM,卡內有 5天/500MB,不算多,但勝在免費。

好處:免費

壞處:用量不多、繁忙時間網速變慢

注意事項:只有成田機場才有

_______

更多平台立即 Follow:Qooah IG (@qooah)Qooah YouTube,八掛產品發佈會現場,睇盡靚靚 Show Girls