SmarTone 上個月終於正式公佈推出 5G 計劃，雖然遲咗些少，不過 SmarTone 反而有唔少「殺著」令到佢地獲得更多人關注。今日 SmarTone 就喺觀塘 APM 以及中環 IFC 舉行 RoadShow 以展示 5G 應用體驗，期間我地都八到大家關心嘅其中一個問題：咁地鐵線幾時有 5G 啊？
先了解一下 SmarTone 嘅 5G，相信大家都知佢地係全港唯一一間採用愛立信設備建設 5G 嘅一間網絡商。而用 Ericsson 嘅好處，就係可以發揮佢地獨有嘅 DSS (Dynamic Specturm Sharing) 技術。而 DSS 強項在於靈活彈性地給 4G 及 5G 共用頻譜，可以喺 4G/5G 之間嘅信號切換做到 1 微秒。運用現時已有嘅 4G 網絡輕鬆提升至 5G，從而加快全港 5G 嘅覆蓋率。
今日 SmarTone 喺觀塘 APM 以及中環 IFC 舉行 RoadShow，期間我地都訪問過 SmarTone 工程部總管梁忠興先生，問及地鐵幾時支援 5G 呢個好多人都想知嘅問題。梁先生表示，SmarTone 現時 5G 舖設利用 Ericsson 嘅 DSS 技術優勢，透過現時 4G 嘅 LTE 2100 (N1) 頻譜提供 5G 覆蓋，因此可以好快地喺全港各區開啟 5G 服務。
咁地鐵呢？相信大家都知現時地鐵各線 SmarTone 嘅覆蓋及速度都做得唔錯，而梁先生表示已經加緊同地鐵公司合作，最快有望今個月內透過 LTE 2100 (N1) 頻譜，先喺最主要嘅三條線，即荃灣線、觀塘線、柴灣線，提供 5G 覆蓋服務。
5G，大家可能聽得最多嘅係用中頻 3.3/3.5GHz、4.9GHz 或高頻 26/28GHz，好處就係速度快以及超級快，但壞處就係越高頻射程越短。而用 LTE 2100 嘅頻譜去升級做 5G，速度來講對比起 3.5GHz 當然有所不及，但好處就係覆蓋率高好多，而且亦都有 5G 嘅低時延特性，例如平均做到 10 – 12 ms，呢個好處已經比起 4G 嘅 2x 至 4x ms 好得多。再加上，5G 可以讓同時更多裝置連接。據梁先生講，地鐵 5G 開通初期雖然 4G 及 5G 共用 2100 頻譜，但資源唔會偏向其中一邊。因為隨住 5G 手機越來越多，表示用 4G 嘅就自然地會相對減少，所以唔會出現「爭頻」嘅情況。
所以，透過現時地鐵各線嘅 SmarTone 4G 速度，可以大概了解到今年 5G 初期喺地鐵推出時嘅速度，我地就叫佢做「準5G」啦。當然，隨住日後 5G 網絡再升級，來年嘅 SA 5G 網絡，速度必定會比起現時高好多。
以下「準5G」大家可以「先作個參考」，強調返：以下係用 SmarTone 嘅 5G SIM 卡行 4G 網絡作測試，速度跟 5G 必有落差，地鐵 5G 要等開通先有 (最快今個月內)，屆時再為大家測試：
▲ 中環 (大堂)，下載 263Mbps
▲ 尖沙咀 (月台)，下載 277Mbps
除咗大堂及月台，我地早前都有測試過 SmarTone 喺地鐵車廂行駛緊速度，大家按呢度睇返作為參考。換言之，現時 SmarTone 喺地鐵主要三條線嘅 4G 速度已經十分理想，由此可見同樣係採用 2100MHz 頻譜去做 5G 嘅話，相信速度都可以保持到 4G 以上嘅質素，到日後再升級後預計會更加快。
