香港四大電訊商嘅 5G 計劃已經陸陸續續推出，今日終於等到「唯一」非採用華為設備建設 5G 基站嘅 SmarTone 公佈旗下 5G 服務計劃。今次 SmarTone 推出嘅 5G Plan 只有一個，但就可以升級至唔少人所期待嘅無限數據，到底點玩法？一齊睇埋落去啦。
有別於早前 3HK、CSL 以及 CMHK 所推出的多 Plan 5G 計劃，今次 SmarTone 所推出的 5G 計劃只有 $398 月費一個選擇，而 SmarTone 則強調計劃比較「高彈性」。
先講講淨上台計劃，由上圖大家可以見到，HK$398 月費包咗 80GB 本地數據 + 2GB 大灣區數據。而額外送嘅 20GB 數據，則需要喺今年 8 月 31 號或之前上 5G 台。如果係需要無限數據嘅話，需要另加 $80，而佢個賣點係無合約，可以隨停咗呢個無限數據嘅 Top-up，但留意速度係會限制至 5Mbps。
除外，今次個 5G Plan 仲可以喺合約期內將未用完嘅數據滾存落下一個月，本地數據最多可以儲到 500GB，而大灣區數據則可以滾到 10GB。同時，亦可以用增加每張 $120 的 SIM 卡模式達成 Family Plan。
至於上台出機方面，SmarTone 表示限時推廣優惠有 Samsung 嘅 Galaxy S20 系列手機，24 個月合約期內頭 4 個月月費只需 HK$298，期後 20 個月為 HK$398，可獲 100GB 本地 5G 數據。
SmarTone 表示，今年稍後時間將會加入更多品牌嘅 5G 手機。而由上圖可以見到，手機方面除咗 Samsung、華為、vivo、Nokia、oppo、TCL、小米等，仲有日本品牌 Sharp、以及 HTC 同 Apple 等。不過，暫時就仲未有時間表。好似 HTC 前兩日先傳出 7 月會推出 5G 新機，而 Apple 相信就係要等到今年 9 或 10 月發佈嘅 iPhone 12 啦。
相比起另外三個台來講，SmarTone 嘅 5G Plan 選擇確係較少，不過亦都有另類嘅玩法。SmarTone 宣佈推出一個「儲印花」計劃，畀大家今日上台就算無 5G 手機都好，可以每個月儲一個價值 $200 嘅印花，最多可以儲到 8 個，總值 HK$1,600。而儲返來嘅印花，第日就可以用來買新嘅 5G 手機。
5G Plan 就有啦，咁佢個覆蓋範圍又如何呢？受惠於 SmarTone 所採用嘅 Ericsson 基站設備，憑著 Ericsson 獨有嘅 DSS 技術，SmarTone 表示已經可以原有嘅 LTE 升級至 5G，當中有部分地區亦都配合不同嘅頻譜使用，令到覆蓋範圍大增。DSS 技術其好處係可以令到 LTE / 5G 於同一頻段內共存，而 4G 與 5G 之間嘅切換時間可以做到 1 微秒之內。
據 SmarTone 所講，預計今年年底前全港 5G 覆蓋範圍可達 70%，而到明年年中有望可以達到 80% 以上。而沙田至大埔一帶禁飛區的「結界」問題，SmarTone 亦表示會沿用 ESS 技術將覆蓋至該段範圍，不過要真正完全用到高質素嘅 5G，就需要政府同業界一齊去解決。
現時主要公路、熱門商場、主要基建等都已經有 5G 訊號覆蓋。而地鐵沿線方面，SmarTone 提到已經加緊同港鐵公司合作，期望未來幾個月內覆蓋至地鐵範圍。至於真正嘅接收如何、速度如何？我地日後會再同大家測試。
SmarTone 嘅 5G Plan 喺今日 (5 月 26 日) 下午 4:00pm 起，正式接受申請。
