隨住 5G 頻譜正式生效在即，代表香港即將全面步進 5G 年代。日前 SmarTone 宣佈 5G 繼續與 Ericsson (愛立信) 合作，使其成為唯一的網絡設備供應商。咁到底用愛立信基站設備嘅 SmarTone 5G 表現如何？我地今日就到 SmarTone 位於將軍澳中心嘅門市進行實地體驗，而家就帶大家睇睇。
為咗令到更多市民可以親身體驗到 5G，SmarTone 會喺下星期開始，陸續喺將軍澳中心、IFC 以及 APM 等分店門市設立 5G 體驗區，配合 Samsung 最新推出嘅 Galaxy S20 系列手機，等大家可以親自試到 5G 嘅體驗。而今日小編已經率先去到 SmarTone 將軍澳中心門市先行測試，為大家帶來第一手體驗報告。
▲ 將軍澳中心、IFC 以及 APM 等 SmarTone 門市設有 Samsung 最新推出嘅 Galaxy S20 系列手機供進行 5G 體驗
▲ 店內安裝有 Ericsson 嘅 5G 設備！
5G 體驗一：低時延帶來即時視像效果
每次講起 5G，相信好多人第一時間都會諗起速度快。的確，速度就係其最大特性之一。不過，5G 最能夠改變我地生活方式嘅必定低時延技術，因為咁先可以配合最快嘅網絡速度做到即時效果。今次以高清視像通話為例，以往 4G 技術畫像難免有 1 至 2 秒嘅 Delay，相信如果係睇球賽直播就更加可以深深感受得到。而今次喺 SmarTone 5G 技術之下，我地可以見到兩部手機進行視像通話時，兩邊畫像係即時性同步進行。
▲ 喺 SmarTone 嘅高速 5G 網絡底下，兩部手機進行視像通話時，可以見到手指郁動時畫面即時同步進行，證明低時延技術令到畫像唔會再有 Delay 嘅情況發生
▲ 同時，我地亦都可以見到 5G 嘅高速令到畫質傳送都大大提升，就算係進行視像通話，都可以見到畫像極清晰，唔會起狗牙亦都唔會有太多雜訊出現
5G 體驗二：超高速影片上下載無人能抗拒
個個都鐘意上網速度快，所以 5G 嘅表現相信都無人可以抗拒得到。我地今次就試下影片上下載以及 Google Play 下載大型 App。由以下測試影片可以見到，上載 4K 影片去 YouTube 可以喺約 5 秒內就完成，而 Netflix 下載一集 18 分鐘左右嘅影片，都係 3 至 5 秒內完成。對於鐘意上 YouTube 或者上 Netflix 煲劇嘅朋友來講，真係可以幫你慳返超多時間。
▲ 無論上載抑或下載，速度都快到你叫爽爆
▲ 再上 Google Play 下載一個比較大 (560MB) 遊戲試試，約 20 秒就完成
5G 體驗三：4K 線上影片即播即有，等待不再
試完視像通話同埋影片上下載之後，我地又睇下對網絡速度要求極高嘅 4K 影片播放。透過手機 YouTube App 播放 4K 影片，可以見到基本上一按即 Play，唔洗慢慢等影片緩衝。同埋最勁係，就算你快速左右拉動時間軸作快進或後退，喺 SmarTone 5G 網絡底下就算係 4K 影片都可以即時播放。
▲ 睇 4K 影片，先可以感受到 5G 嘅絕對優勢
總結：
5G 網絡即將快速普及，現時搶先一步體驗新技術所帶來嘅好處絕對最適合不過。SmarTone 採用由 Ericsson 提供嘅 5G 設備經過我地實地體驗及測試之後，亦都證明十分之高速以及穩定。SmarTone 以往喺 4G 年代網絡質素一向有極好嘅口埤，喺 2019 年更加奪得由香港通訊業聯會所頒發嘅「最佳移動電話網絡營運商」金獎。由此相信，當 5G 服務正式推出之後，配合 Ericsson 基站設備嘅 SmarTone 5G 網絡將可以帶來更好嘅上網體驗。
