5G 生活已經越來越近,相信大家都開始感受得到。現時全球有 5 個國家地區正式推出商用 5G 牌照,而香港方面亦都緊隨步伐,各電訊商已經磨拳擦掌準備大展拳腳。早前 SmarTone 宣佈聯乘新鴻基地產集團佈置測試站及路演,今日首個設於沙田新城市廣場的大型展覽正式展開,等大家可以親身零距離搶先體驗強大的 5G 技術。

SmarTone 宣佈,於 7 月 11 至 13 日一連三日,假沙田新城巿廣場舉行首個「SmarTone 5G X Fun」巡禮。現場設有多個體驗區,包括透過實時 5G 網絡,與本地初創企業聯手打造的全港首個 5G 實境電競賽車體驗,其他展示包括擴增實境(AR)、混合實境( MR)、人工智能 (AI) 和雲端遊戲等技術,展現不同的 5G 智慧生活應用。另外,現場還展出多部今年已經公佈的 5G 手機,以下帶大家睇睇現場,行街必去!

SmarTone 早於兩年前已進行全港首個 5G 技術展示,更於今年 3 月,成為全港首個同時進行 26GHz、28GHz 以及 3.5GHz 三個 5G 主要頻段進行測試的電訊商。

▲ SmarTone 總裁葉安娜女士表示,SmarTone 已積極部署 5G。讓大眾接觸 5G 為生活帶來的轉變。5G 的高速度、低時延及泛連接可以成就很多切合個人、企業,以至整個社會的創新應用,如智能交通、物流、娛樂、醫療等, 是推動香港成為智慧城市的基石。

▲ 今次展覽路演主要以 3.5GHz 及 28GHz 兩個頻段配合使用,基站設於商場內,可提供極高速 5G 連線。

七大體驗區,齊齊有得試有得玩

「SmarTone 5G X Fun」巡禮現場設有七大體驗區,大家除咗可以加深認識 5G 技術外,亦都可以透過親身體驗來了解 5G 技術對於未來生活帶來的重大改變。

▲ 來到展區,最搶眼的一定係呢個「智極速」。SmarTone 透過夥拍本地初創公司,帶來全港首個 5G 實境電競賽車。

5G 網絡的時延低、下載速度快,連接 5G 的模型車遇上障礙物時,可以即時作出反應。日後無人駕駛車或無人機械用 5G 網絡作為連接時,就唔驚因時延問題而導致撞車或撞到其他障礙物。

隨住雲端應用越來越普及,加上連線速度快,未來串流遊戲將會成為主流。 雲端遊戲是以雲端計算為基礎嘅遊戲方式及在雲端伺服器上運行,遊戲畫面經壓縮後會通過網絡即時傳送給玩家。喺 5G 高速度及泛連接的特性下,玩家隨時可以進行單人或多人實時線上遊戲,無需擔心手機處理器應付不來或長期使用後手機會過熱等問題。

「智超時空」現場設有 AR/VR 遊戲供大家試玩,主要是想透過展示比現時 4G 網絡快 20 倍的 5G 技術,令到影像可以實時傳送,配合 AR(擴增實境)技術,做出 MR(混合實境),令玩家眼前影像與動作同步,從而增加遊戲真實感和樂趣。

5G 技術對於未來機械人發展亦都極為重要,因為低時延的特性可以令機械人作出更即時的反應,呢個「智鬥高手」就畀大家可以同機械手玩包剪揼。由於 5G 速度夠快而且低延時,透過 AI 分析機械手可以即時作出相應動作反應,所以基本上每次都可以贏到玩家。

「智創同步」則展示簽名機械臂,喺平板電腦上手寫文字,再經 5G 網絡傳到雲端,機械臂從雲端接收指令,立即精確地模仿手寫文字,整個過程都好流暢同快速地同步完成。未來當技術發展成熟,甚至可以利用 5G 網絡連結任何地方的手術室,畀醫生進行實時遙距精密手術。

唔知大家有冇諗過夾公仔都可以遙距進行呢?受惠於 5G 技術超低時延及高速度網絡特性,透過手機程式就可以以串流直播方式,直接喺手機睇住夾公仔時實際情況,然後利用程式介面操作,即使唔喺現場都可以玩夾公仔。

最後,作為 Qooah 讀者相信大家都必定有留意最新手機消息。今次 SmarTone 一口氣為大家帶來六部今年已公佈嘅 5G 手機展示畀大家睇。當中包括 Samsung、華為、vivo 等,作為手機控嘅你一定唔可以錯過。

▲ 左至右:vivo NEX (5G)、華為 Mate X、小米 MIX 3 (5G)

▲ 左至右:TCL 首款 5G 摺屏手機、Samsung Galaxy S10+ (5G)、Oppo Reno 5G

「SmarTone 5G X Fun」首輪路演喺沙田新城市廣場一期 1/F 羅馬廣場舉行,今次已經為我地帶來好多真實 5G 體驗,大家經過沙田一定要去感受一下。另外要提提大家,因為仲可以透過手機收集電子印花,然後就去 SmarTone 門市換領手機配件優惠劵。正如我地之前報導所講,未來 SmarTone 將會陸續喺其他新鴻基地產集團旗下商場進行更多路演,大家日後都必定要密切留意,因為行街隨時有得體驗最新 5G 技術。

_______

更多平台立即 Follow:Qooah IG (@qooah)Qooah YouTube,八掛產品發佈會現場,睇盡靚靚 Show Girls