2) 小店日式人情味，沾麵湯底濃郁
近年興食沾麵，不過屯門有得食沾麵的地方唔多，赤橋拉麵算係屯門區內數一數二地出色。赤姐係紅，間嘢係紅橋，所以叫赤橋拉麵，呢個店名改得好有趣。鋪頭雖然唔係好大，得幾張二或四人枱，坐得有啲逼，不過裝修好有日本風格，凳由汽水箱砌成，好搞鬼。至於麵食由日本師傅主理，有別於元朗姊妹店「彩」，赤橋拉麵除左有沾麵仲有湯拉麵四款湯底分別係：魚介豚骨、黑油豚骨、海老豚骨、辛肉味噌，味濃有層次，值得一去再去。
▲ 魚介沾麵 $78
魚介湯底由魚介麵豉、鰹魚、小魚乾熬製，濃稠度較湯麵底高，重點係加咗柚子皮，多了一份清新感。而麵條由粗粒小麥製成，彈牙幼滑，配合湯底食真的不錯。不過就唔係其他沾麵店，食完麵唔會有熱石同加水，等你當湯飲。
▲ 天氣熱，怕客人等得耐，出面放咗好多把扇畀客人用，仲要畫左公仔，好有心思。
▲可能驚你唔知點食，每張枱都有張手繪說明，上面隻貓貓畫得好得意啊！
▲店內雖然好細，大家都係快食快走，不過中間有個櫃仔擺漫畫，唔知係咪有人會拎嚟睇呢？最搞笑係啲凳，由汽水箱砌成，肥啲都坐唔到。
赤橋拉麵
地址：屯門青菱徑9號華利大廈地下5號舖
營業時間：12nn-3:30pm；6pm-10pm
