對多數用家來說，電腦內置喇叭的聲音只能「有聲」，無論睇戲、打機定聽歌，總覺得差咗啲咩。小米近日推出咗 Xiaomi Desktop Speaker Pro Set，一套由主喇叭與無線重低音組成的 2.1 聲道系統，香港建議零售價為 HK$699(現時特價 HK$609)。究竟呢套桌面喇叭係咪真係值得升級？以下就同大家全面實測一下。
開箱：簡潔齊全
打開後可見主喇叭、無線重低音揚聲器、兩組電源適配器、喇叭數據線及說明書。配件齊全，無需另購線材，開箱即可直接使用。值得一提，無論主喇叭定低音喇叭均需獨立插電，但低音喇叭以 2.4GHz 無線連接主機，桌面唔會多咗一條尷尬嘅音頻線。
外觀：金屬質感＋RGB 燈效
主喇叭採用長條形 Soundbar 設計，尺寸為 511 × 75 × 75mm。正面覆蓋金屬網罩，兼具型格與耐用性，同時保護內置單元，整體質感遠超同價位常見嘅塑膠喇叭。底部設有四個防滑腳墊，放置穩固不易滑動。
值得一提嘅係主喇叭採用 53° 向上傾斜設計，呢個角度並非純粹為造型，而垠烘木係針對桌面使用場景精準調校——一般喇叭水平出聲時聲音容易向桌面散失，53° 上傾角令聲音更直接傳向用家耳朵，聽感更自然集中。
無線重低音喇叭尺寸為 150 × 150 × 219mm，圓柱設計簡潔有力，放於桌面或桌底，輕鬆融入不同風格
而且頂部亦做了「同心圓」紋理，質感提升。
此外，主喇叭內置 24 顆 RGB LED，低音喇叭亦配有 5 顆燈源
提供6 種動態燈效（彩虹、極光、星光閃爍、爐火、呼吸燈及派對模式），燈光會隨音樂節拍變化，為桌面增添視覺氛圍。
功能：配置齊全，操控直觀
單元配置方面，主喇叭採用水平四單元配置，包括兩個 10W 跑道形驅動器及雙被動式輻射器，有效營造寬廣嘅水平桌面音場。
無線重低音則搭載 96mm 長衝程驅動單元，低頻可下潛至 60Hz，配合精密調校嘅聲學導管，低音紮實有力。
音效處理方面，內置專業 DSP 數碼音訊處理器，提供 5 種 EQ 場景模式：音樂（細節還原）、低音（強化低頻震撼）、人聲（提升語音清晰度，適合 Podcast 或通話）、遊戲（強化定位與方向感）、電影（營造寬廣立體聲音場）。低音喇叭會自動跟隨所選模式調整輸出特性。
連接方式選擇多元，支援 USB、藍牙 5.3 及 AUX 輸入，無論連接電腦、手機或平板都無問題。主喇叭與低音喇叭之間採用低延遲 2.4GHz 無線技術，同步表現理想，聲音與畫面唔會出現明顯甩咀。
操作體驗方面，主喇叭側面設有多功能旋鈕（同為同心圓紋理設計，手感和質感兼備），配合頂部兩個按鍵，可一手控制音量、切換 EQ 模式及調整 RGB 燈效。用家亦可透過「Xiaomi C-Hub」專用電腦軟件(有 Windows 同 MacOS )進一步自訂 EQ 及燈光設定，滿足進階用家需求，但只能連接 USB 線才可以使用「Xiaomi C-Hub」。
音色：層次分明，低音驚喜
實際聆聽，呢套喇叭嘅表現有幾大亮點：
低頻係最大驚喜。無線低音喇叭嘅 60Hz 下潛雖未及發燒級音響（一般 Hi-Fi 可達 20–30Hz），但以桌面系統而言已相當紮實，無論睇電影嘅爆破場面、遊戲中嘅環境音效，定係音樂嘅鼓點，都能帶來明顯嘅「體感」層次。
中高頻方面，兩個 10W 跑道形單元配合 53° 上傾角設計，令聲音擴散均勻，即使坐喺屏幕側邊，仍能保持清晰嘅立體感。人聲模式下令對話內容格外清楚，適合睇新聞、聽 Podcast 或進行視像會議。
遊戲模式下，聲音定位表現有明顯提升，腳步聲與環境音方向感更易辨別，對競技類玩家有一定幫助。電影模式則進一步擴闊音場，營造更具沈浸感嘅環繞效果。
不過有幾點需要留意：藍牙僅支援 SBC 編碼，未能對應更高規格嘅無損傳輸，對音質有極致要求嘅用家建議使用 USB 或 AUX 有線連接。另外，小米未有公佈系統總輸出功率，「每個單元 10W」僅反映單元規格而非整體系統功率。
總結
Xiaomi Desktop Speaker Pro Set 定位清晰——為想升級桌面音效但又唔想花太多預算嘅用家而設。HK$609 呢個價位，能夠擁有金屬質感機身、四單元主喇叭、獨立無線重低音、DSP 五種 EQ 模式及 RGB 燈效，性價比確實相當突出。
實際體驗上，53° 上傾角設計對日常聆聽嘅提升比純粹堆疊規格更「有感」，而無線低音喇叭嘅加入亦令桌面喇叭唔再只有「高音硬撐」，低頻表現遠超市面同價位產品。加上 USB、藍牙與 AUX 三種連接方式，無論辦公、娛樂定遊戲場景都能應付自如。
如果你正為電腦尋找一套能同時兼顧音質、外觀、低價與桌面氛圍嘅喇叭，小米呢套 Desktop Speaker Pro Set 絕對值得一試。
