PCCW 今日宣佈推出全新多媒體娛樂服務新平台 Now E，跟現時已有的 Now TV 服務最大分別在於主打年青人流動市場，實行要搶盡家庭以外的遊離用戶，因為此平台最大賣點係無須合約下就可以隨意購買月費或日費變得更自由無束縛。
Now E 全新多媒體娛樂服務可以話係 Now TV 分離版，主要對象目標群係一班非 Now TV 用戶，希望透過方便接入方式來吸收更多用戶使用。所以，由定位可見會偏向年青一族，而非現有的 Now TV 家庭用戶。
話明針對年青一族，所以 Now E 內容提供方面亦都會切合年青一族口味，當中包括 HBO、MOViE MOViE、Now Baogu 及 Viu 等內容供應，隨時收睇熱門電影、劇集、綜藝節目及動畫等。
此平台將會以手機及平板電腦 App 為主，同時亦都會推出一部預設一開機即睇 Now E 嘅 Android TV Box，方便喺手機、平板電腦以及電視上收睇節目。一個帳戶可以最多支援五個裝置，以及兩個裝置同時串流觀看。
Now E 專用 Android TV Box 提供兩個 HDMI 輸入，以及一個 HDMI 輸出，方便將其他 TV Box 駁入來再輸出去電視。
今次推出 Now E 會連同 HKT 旗下 The Club 一齊做推廣，使用唔同服務可獲得世界盃通行證。同時，The Club 仲會送出 100 萬張世界盃一日通行通，不過暫時未知確實派送日期 (日後有更新消息再告佈) 。
至於收費方面，有多個選擇而且無合約。最基本綜合娛樂組合每個月 $98，新客戶有 1 個月免費試睇。如果淨係想睇波，2018 FIFA 世界盃賽事 64 場通行要 $980，又或者想睇某一場可考慮 $98 買一日通行證。
另外，如果想要埋個 Android TV 盒接駁電視，機價 $1,288 包埋部份內容，好似世界盃、Viu (12個月) 等，詳情可以睇睇上表。
Now E 將會同時推出 iOS 及 Android 版本 App，不過暫時仲未有得下載，要等到 5 月 28 號先出，大家到時可以再留意下。
