幾時都話 Hello Kitty 無處不在。今次 Kitty 就去咗有港版築地之稱嘅築地．山貴水產大搞「櫻花祭」。嘩嘩嘩！Kitty、日本菜、櫻花，樣樣都係港女最愛，男朋友們今個長假識做啦！而我 依莉詩 梗係急不及待去影相呃 like 啦！
6款 Kitty 限定美食無走樣
乜築地唔係食刺身、海鮮丼㗎咩？同 Kitty 會唔會唔夾㗎？今次 6款限定美食有海鮮丼，有甜品，唔單止將 Kitty 嘜頭完全融入，仲要無走樣添！叫得櫻花祭，除咗 Kitty 之外，仲加咗櫻花裝飾，打卡一流呢！
▲ Hello Kitty 海鮮丼 $198
呢個海鮮丼有大大個用白飯造嘅 Kitty 樣，但唔好以為偷工減料。原來 Kitty 下面收埋咗唔少魚生，而魚生都係每日由師傅揀出嘅 4-5款時令魚生，非常足料。要兩個人先食得晒呢！
▲ Hello Kitty 吞拿魚腩蓉手卷 $68
手卷竟然係 Kitty 唔係魚生，但唔好以為又係得舊飯，入面收埋咗好多吞拿魚腩蓉，食落好 carmy，又鮮甜。
▲ Hello Kitty 玉子燒 $58
日本人習慣食完壽司，係食甜品之前食件玉子，少少甜，點娺一下。呢件玉子燒比想像中厚實，反而我幾欣賞旁邊嘅櫻花和菓子，透明粉色好夢幻呢！
▲ Hello Kitty 士多啤梨鬆餅 $98
呢個班戟上面印有 Kiity 樣都幾可愛，但就比想像中迷你，得掌心 size。而每一層都夾住薄薄士多啤梨同忌廉，好考師傳技巧呢！
▲ Hello Kitty 水信玄餅 $38
水信玄餅就咁已經好靚，呢個仲要係 Kitty 樣，呃 like 一流！平時水信玄餅加黃豆粉同黑糖，而呢個轉用糖水，比平時嘅甜。
▲ 櫻花 Frozen beer $98、梅酒杯套裝 $688
賞櫻又點可以無酒？櫻花祭嘅梅酒同啤酒都同咗特別版 Kitty 杯，粉絲們不得不入手呢！
▲ 食咗咁多仲未夠喉的話，乾貨區仲有好多 Kitty 零食，等你帶番屋企啊！
Kitty 處處，唯櫻花裝飾不多
如果要叫主題餐廳，食物方面就合格有餘，但裝飾方面就嫌少咗啲櫻花。除咗門口嗰支，就只有貼紙嘅櫻花圖案，無想像中咁浪漫呢！不過從大門、店內的柱及牆、玻璃窗，到枱面都可以搵到 Kitty 蹤跡，已經夠粉絲興奮。
▲ 落地玻璃貼滿 Kiity 同櫻花，配合維港景色，夠晒特色。
▲ 梅酒區都有 Kitty 貼紙呢！
築地・山貴水產 x Hello Kitty 櫻花祭
地點：築地・山貴水產 – 灣仔碼頭2樓
日期：2017年4月28日至2017年5月31日
