香港人為左有得揀電視節目，近呢兩三年來不斷抗爭不斷爭取。好啦，HKTV出現後令到大家充滿希望，但係可惜又俾政府打壓到就算10萬人上街都取爭唔到牌照。結果，我地又係焗住被大台洗腦，繼續無得揀。擁有獅子山下精神o既我地又點會咁易屈服，因此代表著8,90後一輩的毛記電視可謂就係大家的清泉，今日就係佢地舉行第一屆分獎禮，大家又點可以唔支持呢！
「毛記分獎典禮」今晚會o係伊莉莎伯體育館進行，由於座位有限以至到大部份人都買唔到飛入場。原本諗住冇得睇好可惜，但幸好Now肯讚助今次個Show，所以會由佢地提供直播服務（唔通等大台直播俾你睇咩）。
有得睇我地就緊係開心到跳起Yeah啦，之但係點樣睇到呢？對於已經好熟o既讀者朋友來講，大家就可以無視呢篇文，不過Winson我都係想分享俾更多人知道(係，我想用念力拖低大台收視)，所以都講講啦。
幾點同邊個台有得睇？
話就話Now有直播，但首先當然你要知邊個台有得睇啦。今晚(2016年1月11日)Now會o係100台同102台度做直播，時間係8:00呢兩個台都係免費台，所以大家基本上都唔洗擔心收睇問題。
出街齊齊睇
睇Show緊係一班人睇開心啲，出街睇就不外乎去一啲有Now 100或102台直播o既地方，例如K房！又或者，一班熱心網友將會搞戶外直播，大家都可以去Join佢地。暫時來講，都有唔少地方會搞。包括：
中環 ： 真 · 公共空間睇毛記電視分獎典禮轉播
除左香港，仲有：
澳門： 《愛瞞》隔岸強行轉播「毛記電視第一屆十大勁曲金曲分獎典禮」
用App睇
如果，萬一，你又冇飛又冇得坐定定o係屋企睇的話，緊係裝個App就最方便啦。咪就係裝返NowTV個隨身播囉。不過，睇片要用好多Data，大家最好緊係用Wifi來睇啦！
用電腦睇
可以安坐屋企，屋企又冇裝Now的話，用電腦睇都一樣方便！你只需要記低以下個直播網址就得：
用電視睇
最後呢個，其實都唔洗講掛，咪就係裝NowTV囉。又或者，你可以由手機、電腦用Wifi、HDMI線，再轉出至電視都得，一邊食晚飯一邊睇就最o岩啦！
海外點樣睇？
海外，大家都知，幾乎全部香港電視台都會因版權問題而封鎖。所以，對於身處海外旅行又好，公幹又好，讀書又好o既廢青來講，點算好呢？嗯，其實就已經有人想「強行轉播」，當然係用YouTube啦，所以返左大陸就自己翻牆啦。不過都係果句，因為版權問題，所以YouTube可能會Ban，大家今晚睇到就睇，睇唔到就VPN返香港睇啦。
