Sky 一直都有飲咖啡習慣，不過來來去去都係出邊買 Pacific 同星巴巴嗰D，唔係話佢地唔好飲，只係佢地冇咩特色，而且行業關係，其實係屋企時間多過出門，每次想飲啡都好麻煩。所以最近入手咗 PHILIPS 呢部 Barista Switch 半自動咖啡機，磨豆手沖、膠囊都用得，仲有打奶泡功能，主打一部機有齊曬功能，而且價錢唔貴，而家有優惠做緊三千尾就有交易，個樣仲要超靚仔。靚仔歸靚仔，實唔實用，沖出嚟效果如何？不如我哋一齊開箱玩吓。
開箱
拆開盒之後，我地先嚟睇下D跟機配件會有D咩。
壓粉錘、咖啡粉盤有兩個，有分一杯份同兩杯份，咖啡豆儲存盒，取粉器，膠囊沖煮手柄，奶泡杯，還有清潔用的的掃同刷。
機背上是有一個水箱，需要自己加水，建議大家要用蒸餾水／純淨嘅過濾水，而且兩至三日用唔曬都要更換，清洗水箱，健康最緊要。
下面的接水盤可以分開拆出，方便清潔。
拉開接水盤入面暗藏一枝針。用於清潔蒸汽奶泡棒的噴頭用。
取粉器加上一個接粉環配件就可以用嚟取咖啡豆，千祈唔好用手接觸豆，會好易發霉。同時咁樣可以更好取得岩份量嘅咖啡豆。
將豆倒入咖啡豆儲存盒(先安裝到咖啡機上)，其實一次可以放定幾日份量，唔使每次都要取豆咁麻煩。
機頂有一個研磨位，用嘅係不鏽鋼錐刀磨豆，產生熱力比較少，可以更好保留咖啡豆原本嘅香味。需配合咖啡豆儲存盒用。
裝好咖啡豆儲存盒之後，通過轉動儲存盒可以調整研磨咖啡粉嘅粗細度，總共有15段研磨度揀，經過我個人測試，最佳的細膩度在 2 ～ 3左右，會最好咁萃取到咖啡嘅風味同油脂，香味充足。大家可以自己調試適合自己嘅粗幼度。我畀少少個人意見，如果係呢部機用，1～3係 espresso 最佳選擇，如果4～10可以沖 Lungo，如果 11～15 並唔適合係呢部機用，可以出粉之後直接做手沖咖啡。
呢個係取粉口。
組合好之後，成部 PHILIPS Barista Switch 就係呢個樣。
正面按鍵我哋由左到右講：寫住 1x 就係一杯 espresso 嘅份量，而 2x 就係兩杯 espresso 嘅份量，自己根據粉盤量來選擇。中間是壓力錶，如果你沖咖啡時指針到不了 Optimal range 範圍，就是你的壓粉不夠實，如果超出 range 就是你粉壓得太實。如果不夠實，萃取度會不夠，太實有可能根本流不出咖啡液，甚至會因壓力過大而中止萃取。再過去嗰D就係膠囊沖泡，要沖膠囊咖啡時就用佢。最後就係開關機。
開始沖咖啡
首先將接粉器放入去研磨出粉口，然後手柄向下拉一下就會開始出粉，拉一下嘅出粉量就係一杯 espresso，如果想濃少少，可以出一次粉之後，再拉一下再出粉，再拉一下就停出，自己按自己需要控制粉量。
呢個出粉方式會令D粉噴到周圍都係，最好壓粉前「拍一拍」佢，但噴係機外嘅粉就要自行清潔啦。
呢個壓粉錘係純人力壓，所以要自己掌握好壓粉力度同角度，玩開又有條件可以買個機械式會好D，另外就係唔好學相入面可懸空壓，要放枱面壓，我係因為方便拍攝先咁做。
相入面就係 3度研磨嘅粉，壓完之後亦十分好。
我地開始萃取。
機內有NID同NTC系統，可以精準控制水溫，萃取出嚟嘅 espresso 香味得到更好嘅發揮，油脂濃密。
如果倒入冰杯就會變成一杯冰美，如果想飲 Latte 或者 Cappuccino 你就要做多一步，去打奶泡。
PHILIPS Barista Switch 本身有蒸汽打奶泡功能，擰左就蒸汽打泡，如果擰右就係出熱水，用嚟清洗打奶棒嘅噴嘴。
自己都可以輕鬆打奶泡，如果你想飲 Cappuccino 拉花就要學下點打奶泡。
拉花我就唔識架啦，唯有表演拉柴。。。
用後感
優點
整體而言對於新手或者非專業嘅咖啡愛好者嚟講 PHILIPS Barista Switch 上手難度幾乎係零，跟住說明書幾個步驟已經可以學識點用。而且佢係多功能合一，有齊磨豆、沖啡、沖膠囊、打奶泡功能，基本就可以滿足沖大部份的咖啡。所以易用係呢部機最大賣點，而且樣靚都係佢大賣點之一。
缺點
研磨出粉口使用完之後好黐粉，必須要用個掃掃乾淨，清理起嚟唔算麻煩。但出粉同時會彈到機外其他地方都係咖啡粉，出粉設計不太好。
