作為香港人相信大家最少都有一張八達通喺身，如你又係 iPhone 或 Apple Watch 用家的話，咁就唔好錯過以下呢則消息，因為大家都有機會獲得 HK$100 八達通增值額作迎新優惠。
自從 Apple 錢包正式支援香港八達通作快速交通支付卡後，相信好多人都第一時間喺 iPhone 或 Apple Watch 上邊加入一張八達通。做法通常有兩種，一種係直接用 Apple Pay 買多張八達通虛擬卡。而另一種，就係將現有手頭上嘅實體八達通卡移植入去 Apple Pay 度。
而為咗推廣更多人喺 iPhone 或 Apple Watch 加入八達通，近日八達通公司就推出一項迎新優惠：由2021年6月1日至2021年8月31日，新客戶轉移實體八達通卡到 iPhone 或 Apple Watch 並作一次消費交易，便可獲 HK$100 八達通增值額作迎新優惠。
所以，如果你同 Winson 一樣仲未將實體八達通加入 iPhone 或 Apple Watch 嘅話，咁你就快啲喺 8 月 31 日前去加入並且去官網度登記一下啦。
如果無實體八達通卡呢？都唔洗灰，因為今次個優惠如果係透過 Apple Wallet 去買張新八達通卡嘅話，都可以獲得 HK$50 迎新優惠。
