香港 5G 服務已經推出咗一段時間，各電訊商係時候要諗多啲應用方案吸客。其中 SmarTone 上星期就推出咗一個新 5G Plan，用意係想畀大家喺屋企當寬頻。以月費 $148 就有無限 5G 數據來講，尚算吸引。如果要將 5G 訊號當屋企寬頻用的話，一個 5G Router 就是必須的。用得呢個 Plan，SmarTone 自然有 5G Router 配套畀到大家。今次就同大家測試一下，睇睇好唔好用。
SmarTone 今次推出嘅呢個新 Plan 對於有光纖入屋嘅朋友來講可能未必吸引，因為光纖速度一定快同穩定過 Data 上網，不過對於一類住唐樓或者鄉效村屋無光纖舖線嘅人來講，有一定吸引力。
以往要用到 SIM 卡上網一般都係 4G，但而家已經開咗 5G 當然係要用返 5G 啦。而 SmarTone 藉著 Ericsson 嘅 DSS 技術已經將部份 4G 訊號升級成 5G 令到覆蓋率大大提升。
要將 5G 訊號變成屋企寬頻，一部支援 5G SIM 嘅 Router 就少不免。而家上 SmarTone 呢個新 Plan 就可以加 $2,160 購買，部機支援 Wi-Fi 6 制式，簡單理解就係以 5G 訊號轉成 Wi-Fi 6 訊號畀家中所有上網裝置用。
部機用法好簡單，機底打開插入 5G/4G 數據 SIM 卡，再插上電源就用得。留意機底有兩個 QR Code，一個係 2.4G Wi-Fi 一個係 5G Wi-Fi，只要用 Android 手機 Scan 一下就會自動連接，免去手動輸入密碼嘅麻煩。當然，預設密碼係隨時可以進入 Router 後台度修改。
Router 插上電源線開機就用得，無須進行任何設定。而機身亦設有一個 WAN 頭及兩個 LAN 頭，如果屋企本身有寬頻線，唔插 SIM 卡當佢係普通 Wi-Fi 6 Router 用亦得。
▲ 開機後，稍等一陣，所有指示燈著起就可以使用。其中最頂三粒燈係訊號燈，著晒三粒代表訊息接收良好
Winson 自己本身住大埔比較入嘅位置，平時手機上網速度比起市區慢。以往用手機 SIM 卡網絡測試一般只有 2x 至 3x Mbps 之間。而今次呢部 Router 據了解有內置 Extender 功能，可以將訊號放大，令到上網速度更加快。
▲ 測試時，手機插 SmarTone SIM 卡下載速度為 37.4Mbps
▲ 連接 5G Router 後，下載速度略升至 62.5Mbps。呢個速度，約等於 100Mbps 光纖寬頻。一般上網卓卓有餘，播放串流影片 1080P 或以下都好流暢。
現時大埔地區 SmarTone 嘅 5G 訊號仍未完整覆蓋，但透過其 DSS 技術已經可以透過 4G 既有嘅 2100Hz 頻譜來發射 5G 訊號。測試所見，由於 Winson 本身居住位置比較入，所以訊號亦比較弱。這亦是今次 SmarTone 推出呢個 Plan 嘅目的。以往住唐樓或者村屋因為無舖設光纖線，所以上網只能透過 ADSL 電話線超慢速，或者以 4G 數據卡上網。今次 SmarTone 推出 5G Plan 就正好解決呢個問題。速度上，當然會好受到接收範圍所影響，而測試所見經過 5G Router 後的確有所改善。
Update:
▲ 我地測試咗另一個訊號接收較好嘅位置，下載速度達到 308Mbps，算是不錯的成績
不過就要留意，今次個 $148 Plan 張 5G SIM 只可以用於呢部 5G Router 或者其他限定型號 Router，但就唔可以用落手機度。對我本人來講，由於居住地方無光纖線，所以速度其實尚可。呢個價錢，我會當係申請一條 100Mbps 嘅寬頻線。對於住市區有 1Gbps 或以上嘅人來講，實覺得貴，但對於一眾住村屋嘅用戶來講，還可以啦！
PS. 部 Router 無限定喺邊度用，換言之你喜歡的話將佢帶返公司／朋友屋企用都得，去到 5G 訊號接收好嘅位置速度自然會更加快。3.5Ghz 嘅 5G 訊號範圍就可以上 500Mbps 或以上，一個月費開心 Share！
