以往每年果農都會期待 iPhone 發售日，因為可以大炒特炒。不過，打從 iPhone 8 開始呢種情況已經一年不如一年。今年 iPhone 11 情況又如何呢？可否令 Apple 重振一下當年表現？我地今朝來到 IFC 的 Apple Store，跟大家睇睇現場實況。
今早前來 Apple Store 取機嘅都係上星期開始透過網上預約，取機時間係早上 8 點正。IFC 的 Apple Store 旗艦有三層，而今年 10 點正式開舖時間前只開放了最頂一層供預約人士取機。
現場所見，門口一早有人排隊，為圍並不算太多，「打蛇餅」只有兩三層，場面同往年對比好明顯冷清。搭正 8 點後正式開放入店取機，Apple Store 各職員同樣以歡呼式拍掌歡迎。
不過大家最關心嘅係，有冇得炒？我地所見現場收機人士極少，而這些「收機人」其實已經不是「收機佬」，只係想即時買機自用或者送人嘅人士。打聽了一下，有一兩位人兄佢地都想要午夜綠，願以原價多 HK$300 收機。
而根據一些手機回收報價 Group 所見，有極少水位嘅幾乎都係 iPhone 11 Pro Max 午夜綠 256 或 512GB，並講明 10 點前以高原價約 HK$300 收機，其他型號方面已經跌穿 IPO。
