自從數碼通推出自由鳥以吸引年輕人市場後，3HK 亦都以主打社交網絡數據嘅 MO SIM 應戰。兩者服務都講求無合約，針對學生或想出多張 SIM 嘅人。近期 MO SIM 又有新動作，今次以限時優惠來吸引大家攜號碼轉台。
MO SIM 近日宣佈推出優惠，即日起至到 5 月 19 日只要攜號轉台申請 $68 嘅 MO SIM月費計劃，就會有額外 6GB 數據送。而佢地最大賣點係，數據都係 4.5G 全速。
標題唔係話有 24GB 嘅咩？無錯，是咁的。未有今次優惠之前，MO SIM 原本嘅 $68 Plan 就有 20GB 社交數據加 2GB 本地數據。而今次優惠玩法分兩部份，第一個月下載 MO SIM App 再成功申請攜號轉台，就會額外送多 2GB 本地數據，加埋原本嘅 20GB 社交數據 + 2GB 本地數據即是總共有 24GB。第二個月及第三個月只要以自動轉帳畀月費，就會額外每個月再送 2GB 本地數據。簡單理解，就係頭三個月每個月除咗原本個 Plan 有嘅 24GB 數據外，再額外每個月送多 2GB，共計 6GB。
不過要留意嘅係，社交數據只適用於Facebook、Instagram、WhatsApp、WeChat、LINE，而額外送嘅 2GB 本地數據就無限制。對於平常主要上網都係用社交平台嘅話，咁呢 20GB 就好好用啦！
