SmarTone 實地測試 5G 黃金頻段，5G 網絡「豈止於快」！

相信大家都知，5G 係未來發展趨勢，必定會對大家日後生活影響深遠。但當全世界都講 5G 網絡，唔知大家對呢種新世代上網技術喺現實生活應用上又理解幾多呢？要用到 5G 網絡，其中有三個主要頻段可供傳送訊號，分別係 3.5GHz、26GHz 以及 28GHz。香港通訊事務管理局上個月已公佈咗 26GHz 以及 28GHz 頻段申請者名單，SmarTone 正正榜上有名，惟被譽為最黃金頻段嘅 3.5GHz 則要等到今年稍後時間先指配。不過唔緊要，因為 SmarTone 剛同時進行咗 3.5GHz 及 28Ghz 頻段測試，而且仲現場展示咗幾個現實生活上嘅應用，而家就帶大家深入了解一下！

喺 4.5G 到 5G 嘅發展里程碑上，SmarTone 提到早喺 2017 年就成功進行本港首個 5G 技術展示，包括成功完成 FDD Massive MIMO 測試及透過智能手機實時測試 5G 網絡。目前雖然政府仍未正式指配 3.5GHz 頻段，而 SmarTone 已經獲得通訊事務管理局辦公室發出的測試准許證，同步進行 3.5GHz 及 28Ghz 頻段嘅 5G 網絡測試，以取得更多數據進行基站調整設定，為來年服務正式推出而作出更全面嘅準備。

3.5GHz 及 28Ghz 特性及優勢之處，5G 豈止於快！

5G 技術所採用嘅 3.5GHz 頻段速度可達 1.5Gbps，網絡延遲為 7ms 或以下，支援 Massive MIMO 覆蓋能力與今天用於 4G 的頻譜差不多。而 28GHz 頻段速度更可達到 4Gbps 或以上，同時網絡延遲縮短至 3ms，不過就如 Wi-Fi 信號一樣，會受到環境影響，而且傳輸距離亦會較 3.5GHz 略短。

因應多種環境實地測試，為日後正式推出作準備

SmarTone 今次特別整咗流動科技車，喺牛頭角如心艾朗酒店附近一帶設立一個基站以同步進行 3.5GHz 及 28GHz 測試。而且，仲喺唔同天氣環境同時段下進行。分別係晴天非繁忙時間、晴天繁忙時間、雨天非繁忙時間及雨天繁忙時間。

▲ 28GHz 訊號覆蓋範圍測試結果

▲ 3.5GHz 訊號覆蓋範圍測試結果

由測試可見，正如上文所講 28GHz 訊號因高頻關係比較易受環境影響，覆蓋範圍會較細，但延遲低，適合提供高流量熱點覆蓋。而 3.5GHz 則相對穩定，喺咁多個環境之下覆蓋範圍幾乎無受到太大影響。

我地再來睇下貨櫃車行走時嘅實時測試情況：

▲ 貨櫃車由基站附近出發，一開始大家見到兩個頻段訊號穩定，28GHz 速度高達 3.3Gbps 網絡延遲低至 2ms；3.5GHz 速度亦超過 1.1Gbps 網絡延遲 5ms 左右。同時，充分測試出兩個頻段特性，28GHz 雖然覆蓋較弱，但係訊號同傳輸速度快，非常合適做熱點式覆蓋；而 3.5GHz 覆蓋範圍較廣泛，可用以建立室內網絡。所以兩個頻段對 5G 建網都非常重要！

SmarTone 今次同步進行 3.5GHz 及 28GHz 測試，目的就係要獲得更多數據參考，為 5G 建網做好規劃，等大家到時可以享受一個最佳嘅網絡體驗。

5G 網絡生活應用，低延遲嘅重要性

每次講起 5G，相信大家第一時間都會諗起「上網速度比 4G 快」。的確，快就係必然嘅。但係「快」除咗係指「下載速度」快之外，更重要嘅係網絡延遲可以比起 4G 縮短多達 50 倍。代表當裝置以 5G 網絡連接(例如雲端電腦)，低延遲性可以提供到近乎即時回應，以作出實時反應。所以，除咗應用喺手機上網之外，物聯網更加可以被充分發揮。當中例如自動駕駛系統、機械人應用、教學應用、遙距手術等醫學應用等。

一齊來睇睇現場幾個 5G 網絡現時生活應用示範，等大家了解一下高速網絡速度以及低網絡延遲嘅重要性：

▲ 5G 嘅高速數據傳送以及低延遲性十分適用於教學儀器上，例如呢個「擴展實㬌沙盒」。當用手或鐵鏟將沙箱內的沙堆成不同地形時，3D 投影機會收集數據作分析及運算，投影機就可以即時喺沙上顯示各種地理資料，例如是等高線(以不同顏色表示)。另外，如果將手掌放喺投影機前，手掌嘅陰影仲會被即時解讀為雲並形成落雨效果。整個操作示範十分流暢，令到大家好似置身喺大自然當中，從而令學生們更加容易理解同吸收教學知識。

▲ AR 技術係現時大趨勢，透過 5G 高速網絡協助之下就可以滿足仿如置身其中嘅體驗。例如以上示範，利用 iPad 內嘅地圖觀看一個市區規劃計劃的縮微模型。放大到街道水平，等你好似置身於 360 度 混合實境的城市規劃體驗中。

▲ 簽名機械臂，喺平板電腦上手寫文字，再經 5G 網絡傳到雲端，機械臂從雲端接收指令，立即精確地模仿手寫文字，整個過程都好流暢同快速地完成。

▲ 網絡延遲低仲有咩特別作用呢？要數應用就多囉，另中一個用途就係機械操作，例如以上影片嘅「包、剪、揼」示範。可以睇到操作者對住機械人出「包、剪、揼」時，左邊隻機械手會運用 AI 機械學習技術去分析操作者嘅微細動作，透過 5G 低延遲特性即時作出相對應手勢，所以基本上機械手每一次都可以贏到操作者。

▲ 講起 5G 大家都知道下載速度快，但網絡延遲低更為重要。透過以上呢個 4G vs 5G 測試示範，大家就可以見到喺同步操作之下，畫面左邊 5G 嘅機械人仔比起右邊 4G 機械人反應速度更加快捷，原因正係受惠於 5G 低網絡延遲嘅特性。

5G 網絡正喺全球各地急速發展，而電訊商快速反應嘅動作配合就顯得極之重要。SmarTone 今次展示出 3.5GHz 及 28GHz 測試結果，證明兩種頻段只要互相配合之下，其應用範圍絕對可以遠遠超越現時嘅 4G 網絡。當然，4G 仍然有其實用性未至於需要急於一時淘汰，未來可以配合 5G 在其他方面上使用，為大家帶來更優質生活。