之前雷教授一句引述朋友說話：「叫雞都可以拿部手機出來照」引起熱議。教授之所以咁講我地都相信佢係想表達喺大陸電子支付嘅普及性。雖然 WeChat Pay（微信支付）喺香港都推出咗一段時間，之但係同大陸始終屬兩地帳號不能互通。
曾經喺九月時，微信支付宣佈推出「一 PAY 兩地」，允許香港 WeChat Pay 用戶到大陸直接消費用，惟當時只支援小部份線上或 Call 車服務，包括：美團、點評、滴滴出行及 12306 等線上商戶，對於一類實體店仍未能用得到。
相關文章：WeChat Pay HK 可以在大灣區及中國城市的新世界旗下商場使用
今日，微信支援終宣佈「一 PAY 兩地」作出服務升級，以後除咗線上服務外，線下實體店都會通行。首批線下支援 香港 WeChat Pay 直接支付嘅實體商店已經有八十幾萬間，含括「旅、食、住、行」，當中包括一些大家比較熟悉嘅店舖，例如：喜茶、海底撈、太二、探魚、奈雪の茶、樂凱撒等，亦有一些大型聯鎖店，如：沃爾瑪、永輝生活、屈臣氏等。另外，亦都可以用來買車票或者入場門劵，方便去旅行時用。
以後香港 WeChat Pay 用戶只要先綁定 Visa 或 Mastercard 信用卡或銀行帳戶，並通過身份認證之後，就可以直接用香港帳戶作出支付，使用時系統會因應當時港幣/人民幣匯率而作出過數。目前所知，交易過程暫時唔收手續費，至於日後就要大家留意公告啦。
