香港搭車大家十幾廿年來都習慣用八達通來嘟卡,但隨住越來越多支付工具喺香港插旗之後,付費方式選擇就更加多。不過,講方便程度始終最快係八達通,所以一向以掃碼方式俾人嫌慢嘅支付寶,今日都宣佈推出一部實體 Easy Go 「讀Code」 機,率先同兩間小巴營辦商合作,等大家以後搭車可以同嘟八達通咁快。

Easy Go 中文叫 「易乘碼」,由支付寶公司推出,係一部連接阿里雲伺服器嘅讀取二維碼機,方便大家搭車直接用手機付款。同以往支付寶手機程式慢慢掃碼方式唔同,呢部機除左咗 online 模式外仲同八達通一樣以 offline 操作,分別在於用手機展示二維碼俾錢,唔係一張實體卡,但就同樣做到 0.3 至 0.4 秒內嘟一嘟就得。

「易乘碼」讀 code 機以數據 SIM 卡連接阿里雲服務,可以為司機提供乘客搭車數據分析,而乘客亦都可能喺 App 內查返搭車記錄。乘客除咗可以直接由支付款錢包俾車錢外,仲可以綁上信用卡,而萬一錢包餘額唔夠都可以搭,因為支付寶會幫乘客預付一筆車資,不過如果手機無電就…..GG囉。

_______

更多平台立即 Follow:Qooah IG (@qooah)Qooah YouTube,八掛產品發佈會現場,睇盡靚靚 Show Girls