香港搭車大家十幾廿年來都習慣用八達通來嘟卡，但隨住越來越多支付工具喺香港插旗之後，付費方式選擇就更加多。不過，講方便程度始終最快係八達通，所以一向以掃碼方式俾人嫌慢嘅支付寶，今日都宣佈推出一部實體 Easy Go 「讀Code」 機，率先同兩間小巴營辦商合作，等大家以後搭車可以同嘟八達通咁快。
Easy Go 中文叫 「易乘碼」，由支付寶公司推出，係一部連接阿里雲伺服器嘅讀取二維碼機，方便大家搭車直接用手機付款。同以往支付寶手機程式慢慢掃碼方式唔同，呢部機除左咗 online 模式外仲同八達通一樣以 offline 操作，分別在於用手機展示二維碼俾錢，唔係一張實體卡，但就同樣做到 0.3 至 0.4 秒內嘟一嘟就得。
「易乘碼」讀 code 機以數據 SIM 卡連接阿里雲服務，可以為司機提供乘客搭車數據分析，而乘客亦都可能喺 App 內查返搭車記錄。乘客除咗可以直接由支付款錢包俾車錢外，仲可以綁上信用卡，而萬一錢包餘額唔夠都可以搭，因為支付寶會幫乘客預付一筆車資，不過如果手機無電就…..GG囉。
