香港電訊市場向來競爭得十分之激烈,數家電訊商自舊年開始就紛紛針對唔同市場客戶群作出減價調整希望可以盡吸新客仔。自由鳥 Mobile 自推出以來不停有新動作,可以話係對市場帶來唔少衝擊,而對於各位用戶來講,當然係好事啦,因為有競爭先有著數啊嗎!

之前自由鳥公佈推出月費果時,只有 $90/5GB/月 同 $120/7GB/月 可以揀,而近日再宣佈加推一個入門計劃,將月費壓低至 $38。需知道,由於佢地賣點係無行政費無合約制,所以 $38 就係 $38。

至於呢個 $38 入門版月費,每個月就包咗 300MB 4G LTE 21Mbps 本地數據,如果用凸咗可以自行加購數據,又或者唔加都可以繼續無限上網,只係速度會限至 128Kbps,同時都包埋 1,000 分鐘本地通話時間。

300MB 對好多「大人」來講緊係唔夠啦,半日都可以用晒。但係對屋企小朋友或者長輩來講都用得下,始終一般 WhatsApp 都夠,甚至淨係用來養號碼都 Okay。加上佢個玩法仲有「數據 P2P」,唔夠可以叫家人或朋友 Share 數據。睇來今次自由鳥呢個定位應該都吸引到唔少新客仔。

更多關於自由鳥玩法,可以睇返我地呢篇:「自由鳥 Mobile」咁用最著數!

_______

更多平台立即 Follow:Qooah IG (@qooah)Qooah YouTube,八掛產品發佈會現場,睇盡靚靚 Show Girls