香港電訊界向來競爭得十分激烈，昨日 HKBN 同 csl. 分別舉行記招宣佈有關新推出漫遊數據計劃事宜，其中 HKBN 更是開出一個 $198 月費低價包 5GB 本地 + 5GB 海外漫遊數據仲送埋一部價值 $2,500 手機 Wifi 蛋。而今日輪到 SmarTone 出招，實行來個大反擊。
SmarTone 剛宣佈推出限時優惠，原本月費 HK$298 享 FUP 無限數據，而今次就俾多個選擇一班鐘意去旅行或者經常要周圍飛工作嘅朋友揀。就係同樣月費價錢，但就放棄 FUP 無限本地數據，轉而免費將個 Plan 原本包嘅 6GB 4.5G 全速數據升級至六地共享漫遊數據。呢六地包括：香港、中國內地、澳門、台灣、日本及新加坡。即係，一個月費同一張 SIM 卡喺呢六個地方都可以共享 6GB 數據，而返到中國大陸仲可以上 Facebook、WhatsApp、睇 Google Map 等。
咁如果爆左 6GB 又點呢？SmarTone 表示爆 Data 後可以半價選用「升級」漫遊數據日費計劃，或以 HK$50 增值 500 MB 共享數據用量。
如果你又想本地無限數據，但又想要埋共享數據又點呢？今次 SmarTone 都俾多個選擇大家，就係可以每個月加 ＄168 升級至 FUP 無限數據。
