四年一度嘅世界盃又殺到，今年香港轉播權由香港電訊旗下嘅 Now TV 獨得。上年 11 月底該公司已公佈過 Now TV 與 ViuTV 獨家播放俄羅斯 2018 FIFA 世界盃相關事宜，而今日在香港國際影視展 (FILMART) 作播放技術示範，更公佈訂購價錢等消息。
全 4K 直播，現場視覺更逼真
記得四年前世界盃時，當年已經有 4K 電視，可惜配套未夠完善大部份人都未能享受到科技所帶來嘅成果。四年後嘅今日，無論 4K 電視、手機、寬頻速度等都已經全面準備好，終於可以感受一下全 4K 所帶來嘅感觀享受。今年主播權由 Now TV 獲得，配合升級後的 4K Now One 機頂盒就可以收睇 4K 直播。
▲ 已升級的 4K Now One 機頂盒
HLG HDR 高動態影像更立體
大家都知 4K 賣點就係解像度高，達 3,840 x 2,160 係 1080p 全高清的四倍。除解像度高之外，仲有 HDR 技術令畫面光暗反差位更明顯，從而提升畫像立體感。今屆世界盃將以 HLG HDR (高動態範圍影像 – Hybrid Log Gamma – High Dynamic) 制式拍攝，透過升級版 4K Now One 機頂盒就能夠支援此制式。同時，Now TV 的 4K 直播採用 10-Bit HEVC 影像解碼技術，可以提供更豐富及細緻的色彩。
▲ 4K 訊號示範，配合 4K 大電視就可以完美欣賞賽事
＄280 訂購 64 場直播通行證
今日 Now TV 已經公佈咗早鳥優惠訂購價，$280 蚊（原價 $880) 就可以訂購今屆 64 場世界盃通行證，可以喺電視、手機、電腦等多個平台上觀賞直播。而如果你已經係 Now TV 客戶，就只需 $200 蚊升級至 2018 FIFA 世界盃 4K 通行證。不過留意，手機只提供高清版。
▲ 64 場賽事直播安排，Now TV 今次 4K 頻道還提供了兩條
