其實旅行時大家都不希望與朋友中斷聯繫 , 所以我們旅行時一是漫遊 , 一是購買好 SIM 卡 . 早前我們報導過「自由鳥」推出的遨遊SIM , 去台灣、日本、新加坡或者澳門可以低至 HK$10 一日 , 可以逐日買 , 用幾多日買幾多日 , 而且任用 , 似乎十分之抵 . 當然亦有人顧慮到速度是否很低、設定使用是否很麻煩 ; 因為去到當地一出問題的話就很麻煩 , 隨時影響旅行心情 . Sky 今次就帶上 自由鳥遨遊SIM 去台灣實地試一試 .
如何購買 ?
首先當然是上去「自由鳥」網站購買啦 , 選好你購買嘅地區(如:台灣) , 留意 , 第一次購買係需要最低消費 HK$50 , 50蚊包咗5日漫遊台/日/新/澳 , 香港郵政平郵寄畀你 , 而且唔係你買咗5日就要一次過全用5日 , 你用幾多計幾多 , 用唔哂可以下次用(365日內) , 其實都OK . Sky 發現 台灣、日本、新加坡或者澳門 都係 $10/日 , 比如你可以先用 3日台灣 , 留返2日下次去日本用都得 . 所以大家唔使怕首次購買50蚊用唔哂會「蝕章」 .
官方就表示平郵要 5個工作天 , 不過 Sky 3日就收到寄來的遨遊SIM . 購買方法好簡單 , 唔使自己去買, 送到府上 .
拆包有D咩??
拆開信封就有一包自由鳥 .
入面就包咗一個 SIM卡套、卡針、自由鳥張 SIM (包哂 micro SIM 同 nano SIM) , 仲有一張使用說明 .
大家要留意 , 卡後面有一個 QR Code 同 ICCID 號碼 , 呢個好緊要 , 大家唔好隨手就掉咗佢 , 因為日後你要再增值或者查仲有幾多日未用就係靠佢 . 如果你唔想 Keep , 你可以好似我咁影張相留底 .
點用 ?
點用?? 當然係換張自由鳥遨遊SIM 入手機啦 . 不過就發生小問題 , 跟 SIM 果支卡針似乎太粗 , Sky 兩部手機都插唔入 , 最後只好暴力插入 , 個針窿就咁大咗…. GG了…
留意 , 自由鳥遨遊SIM 本身係用香港本地網絡商 , 唔需要好似出面鴨記買果啲 SIM 要自己 Set APN , 所以去到當地插入手機 , 開埋個漫遊數據就可以即用 .
測試速度
去到台灣桃園機場 Sky 已經測試 , SIM 網絡用嘅係中華電信 , 最高可以上到 4G+ , 全程亦保持係 4G 或以上 .
Sky 係桃園機場即時做網速測試 , 最高可達89Mbps 下載 , 22.8Mps 上載 .
換個場地 , 當去到台北車站 , 網速即時打回原形 . 37Mbps 上載 , 15Mbps 下載 . 雖然跌咗好多 , 不過都夠哂用 .
惡夢開始 ……
做咗幾次網速測試 + 自用 , 到咗夜晚已經超過每日 300MB 流量限制 , 即時跌入不高於128Kbps 的上網速度限制 . 係呢個時候 , Sky 慢到連自己個網都上唔到 , Facebook 讀取超慢 , 只可以保持到 WhatsApp 同 LINE 等通訊軟件收發訊息 .
讚
- 網上購買 , 唔需要出去 , 寄上門 . 啱哂我地啲有返工冇收工嘅打工仔 .
- 唔需要設定 , 即插即用 . 適合年長父親出門 , 仔女幫佢裝好SIM , 去到當地就即可以用 .
- 可以隨時增值 , 用幾多扣幾多 , 唔使野野硬食 5日或者7日 SIM .
彈
- 每日 300MB 數據流量實在太少 , 睇幾條片可能就用哂 . 如果你只係想 Upload 幾張上 Facebook 或 IG 呃下 like 同保持到聯絡就啱用 .
- 唔包電話功能 , 所以係外地係打唔到電話 , 要打電話都係要用返自己張 SIM 漫遊打 .
