網上行今日宣佈推出 4 x 1000M 多連接寬頻服務，透過新型路由器將入屋的光纖線分配成最多四條，每條 1000M 的獨立上網線路。透過呢種新服務，以後大家喺屋企上網就可以確保上網更穩定，就算人多機多都唔洗爭線用。
以往寬頻做法通常光纖入屋之後，例如一條 1000 M 線就透過一部 Modem 全屋企人共用，雖然大家中間都可以再接 WiFi Router 駁其他機用，除非自己有喺 Wifi Router 再設定每部機所用頻寬，否則通常都要「爭線用」。而今次網上行呢個玩法其實就係，佢幫你做頻寬分配。新服務會提供 2 x 1000M 或 4 x 1000M，即光纖入屋之後就可以經新 Modem 將條「大水喉」分拆成兩個或者四個，每個獨立 1000M 速度嘅 Port 位 (LAN 頭)，等你可以用來再連接其他 Wifi Router 或者係直接連電腦及其他需要上網嘅裝置使用。
▲ 現場測試所見，每個 LAN 頭出來下載速度都十分接近 1000 Mpbs
▲ 新型號 Modem
今次呢個新服務今日 (7 月 6 日) 正式推出，提供兩個選擇，分別係 2 x 1000 M 月費只係 HK$168，而 4 x 1000M 月費就要 HK$458。要留意一下安裝日期必須於申請日起計 21 日後先可安裝，而最早安裝日期為 7 月 31 日。另外，新服務只適用於新申請之指定住戶，最少要簽 30 個月合約。
