屯門潮食集中地
講到美食，香港係一個天堂，咩新潮，咩國家嘅美食都有。最近我 依莉詩 就打算做啲長少少嘅特輯，一於食盡港九新界十八區。介紹嘅第一個區當然係自己最熟悉嘅屯門啦！相信屯門人都知道紅橋係最多小店美食集中地，由松記、豬大王到雲貴風，都係三五知己晚飯宵夜聚腳地。上年開始呢區先後更有三間日式長龍店陸續進駐，真係日日龍尾都無消失過！今次就等我介紹紅橋其中 4間比較有特色嘅店比大家參考下啦！
因為輕鐵站都算密，所以好多地方都會以附近輕鐵站稱呼某啲地方，不過「紅橋」就比較特別，介乎景峰同豐澤輕鐵站中間，兩邊落車都要行 10分鐘先到。大家反而用附近一條紅、白兩色嘅天橋稱呼，所以「紅橋」係真有其「橋」㗎！
因為同 Vcity、卓爾廣場等商場隔咗條屯門河，並無新市鎮嘅繁華，紅橋附近都係一啲比較矮嘅建築同舊式商場，租平，所以聚集咗唔少小本經營的店舖。當然少不了潮流美食啦！
