留係香港拍拖去主題樂園就少不了，但迪士尼同海洋公園一早已經玩到爛，已經唔再係入去一定要玩咩機動遊戲，睇咩表演的時候了！不如試下用另一個角度遊樂園，嘗試下將帶著兩個人回憶的地方好好拍下來吧！
輕鬆裝備邊拍邊玩
其實唔使講都知迪士尼有好多靚景，不過出發影之前都要做啲準備。
1. 清楚目標
出發前清楚目的最緊要。雖然香港迪士尼樂園出名細，基本上一日就玩得晒，不過要知道，如果目標係為影相，可以玩機動遊戲的時間就自然少咗。而且愈早的時間就愈少人，容易影大環境相或者玩更多機動遊戲，所以要將主要目的放係朝早。
2. 挑選日子
記得幾年前迪士尼長期都好多人，不過根據最新報告上年少咗一成人入場，總算多番啲空間俾人行。不過識揀日子都好重要，香港迪士尼唔似東京咁有系統，無得預早上網睇邊日係「沙甸魚日」，不過最易知就係避免紅日同長期去，咁就會少啲遊客，行得舒服好多呢！好似我今次就揀咗 2月星期三去，少了不少強國人，有的都是韓國或日本人，感覺好很多呢！
3. 輕裝上陣
迪士尼對攝影裝備的要求都幾多，除咗唔可以帶自拍棍外，腳架同喼都有一定限制。加上都唔會純為影相，所以我建議都係輕裝上陣比較好。今次我就帶咗一部無反機同一支迷你腳架就算了，方便隨時放入手袋。
4. 搵人幫手
以前每個卡通人物影相位都有攝影師幫大家影相，影完可以比錢買相。宜家呢個「迪士尼處處拍」服務原來擴展到城堡前、木馬前等影相位，而且攝影師仲會教你擺 Pose ，最重要就係可以要求用自己部相機幫你影添！今次我都搵咗兩位靚仔攝影師哥哥幫手，影出嚟嘅相都好靚㗎！當然，你都可以去照片銷售處或登錄迪士尼處處拍網站睇番佢哋的作品，再用 $398 下載當日影過的所有數碼檔。
1) 歐式小鎮大街
一入都樂園，必經就係小鎮大街，旁邊都係糖果色的歐洲風商店，靜靜停係旁邊影相另有一番風味。建議大家一早入園去影，因為 3點就有巡遊，通常兩點幾就開始有人聚集，到時就無位影㗎啦！
▲ 單影個別商鋪門口，感覺好似去咗外國街道咁㗎！
2) 童話般的睡公主城堡
去得迪士尼就必定要係睡公主城堡前影相，要影就快啦！好似話遲啲會拆，然後起個再大啲嘅。好多人都會揀他係正城堡前面影，但咁會有好多路人同空位，所以我建議用花做前景，令張相睇落更有層次感。至於影的時間都係建議朝早，因為 3點有巡遊，2點就會開始帶人聚集。如果想影夜晚就最我好 6點太陽啱啱落山影，因為 7點會有夜間巡遊同煙花，到時就人山人海了。
▲ 城堡下有兩位攝影師幫大家影相，一位係正中，需要排好耐隊，另一位係旁邊長凳。雖然唔係正中間，但個取景角度唔錯㗎！
3) 城堡下的角落
穿過城堡，下方有的磚牆好有古典味，一齊跳番隻舞吧！記得呢度放煙花前會封，所以要影就襯早啦！
▲ 城堡下的佈置有啲懷舊，好特別。
4) 旋轉木馬前的約定
幻想世界又面都有好多靚景，旋轉木馬、咖啡杯都好夢幻㗎！而呢度都有位攝影師駐守，而且超好人，一次過幫我哋影咗三個景呢！仲特登等到旋轉木馬無人先影，好專業呢！
▲ 開頭覺得把劍無乜特別，但加埋旋轉木馬做背景，成個畫面豐富晒呢！
5) 夢想花園與卡通人物會面
平日去少人啲係有好處，不過夢想花園的卡通人物相對少咗。今次就得 Winnie the Pooh 咋！呢個花園開放時間好短，5點前就好入去啦！仲有，影相次餘記得搵卡通人物簽埋名啊！
6) 小小世界變細小
小小世界早排維修過，宜家啲顏色靚番晒！影完相就可以入去玩，變成迷你人一齊唱「世界真細小小小⋯⋯」
7) 公主的童話園林
童話園林係 15年尾新開嘅景點，入面有咩之前就介紹過 (大家Google 「依莉詩 童話園林」就搵到)。係灰姑娘、白雪公主的私家花園遊走，每個場景都變成音樂盒，好好玩呢！而每個場景係相框望出去就係拍攝城堡的最佳角度。
▲ 除了迷你的城堡外，仙女小亭園就將植物放大。係入面自己就會變得好細小啦！
8) 神秘的迷離莊園
迷離莊園好有神秘感，特別係夜晚加上紫藍色燈光就更添恐佈氣氛。不過要影得靚建議帶 LED 燈，今次我用機頂燈影的效果不是太好。順帶一提，7點後因為會準備夜間巡遊，所以反斗奇兵、迷離莊園同灰熊山谷都的機動遊戲都會早收，所以如果係想玩機動遊戲最好順時針，由灰熊山谷開始玩起啦！
叫得上集，當然有下一集啦！下集會同大家講下海洋公園的影相位，密切留意啦！
