推出至今已經超過一年的 Apple Pay 電子支付服務，在今年六月初的 WWDC 時已經公佈了在香港推出，而今日服務終於正式啟動，日後大家就唔洗淨係可以o都百達通或者payWave。Apple Pay 目前已經聯合多家香港主要銀行推出服務，唔少商舖都第一時間加入。使用 Apple Pay 時需要注意啲咩、點用架呢？我地來同大家講講。
Apple Pay 係乜來？
Apple Pay 係 Apple 為旗下產品推出o既電子支付服務，形式有啲似香港推出左一段時間的payWave，透過裝置內置專用的 NFC 晶片作近距離識別，令到整個支付過程卻有如o都八達通一樣咁簡單。而最唔同係只可以經 iPhone、iPad、Apple Watch 等產品使用。
Apple Pay 支援邊啲 Apple 產品？
目前 iPhone 方面，可以使用的包括：iPhone 6s、iPhone 6s Plus、iPhone 6、iPhone 6 Plus、iPhone SE。而 iPad 就係：iPad Pro、iPad Air 2、iPad mini 4、iPad mini 3。另外仲有 Apple Watch！
用 Apple Pay 要準備啲乜？
話明只支援 Apple 產品，所以大家都需要先在支援裝置上連接好信用卡，方法好簡單，大家只需打開 iPhone 系統內置的「Wallet」App (iPad 需要在系統設定 -> Wallet 與 Apple Pay)，然後畫面上就可以見到如下圖要求為 Apple Pay 加入信用卡資料的提示，大家只跟住入資料就得。而要在 Apple Watch 上進行設定，可先在 iPhone 上開啟 Watch app，點一下「Wallet 與 Apple Pay」，然後再點一下「加入信用卡或扣賬卡」。
Apple Pay 支援邊啲信用卡？
除左有支援 Apple Pay 裝置外，另一重點就係要知自己用開果啲信用卡用唔用到。呢方面相信大家擔心會較少，因為暫時就支援到大部份主流信用卡，包括：VISA、MasterCard、American Express。合作銀行方面就有：American Express、東亞、中銀、星展、恆生、匯豐、渣打等等。
Apple Pay 點樣用？
好啦，當你已經入好晒信用卡資料，下一步當然係要知點樣用。操作方式好簡單，你嘅 iPhone 指紋就係密碼，只需要按住 Touch ID 然後再靠近 Apple Pay 支付裝置就可以極速完成付費動作。
邊啲舖頭用到 Apple Pay？
由於香港俾八達通壟斷得太耐，所以你可能擔心 Apple Pay 會太少地方用到。不過都唔洗咁憂慮，因為第一波一推出就已經唔少商店加入，日後相信仲會大批大批咁加入。點解？因為 Apple 個 Logo 就夠晒搶，唔加就輸蝕啦。
仲有咩好處呢？
除左實體店用 Apple Pay 外，仲可以在 App 內購物或者是網站支付(暫時未推出)。而且，萬一 iPhone 唔見左，都可以用 iCloud 的「尋找我的 iPhone」服務即時停用裝置，唔洗擔心會被人盜用，安全過用直接用信用卡。再加上，可以將常用的商戶聯營信用卡同埋獎勵卡加入 Wallet，並以 Apple Pay 付款及換取獎勵，以後儲分都簡單得多。
使用 Apple Pay 有咩限制？
除左要 Apple 裝置外，亦要留意唔同裝置有其可用的地方。好似 Apple Watch 就只可以商店付款，唔支援 App 內購物。而 iPad 就剛剛相反，只支援 App 內購物，唔支援商店付款。詳細見下表：
