隨著9月25日iPhone 6s首日發售日子漸近，相信大家都好緊張回收價有幾多。過去華強價大家就睇得多，今日終於都有香港開盤價出現。大家係咪心諗第一輪點都有得購掛？冇錯，賺的確係有架，但係睇睇價錢表，你可能都會同小編一樣慨嘆今不如昔，一齊來睇睇先啦。
先風數碼今日在Facebook上分享左佢地收回參考價，講明就價錢純屬分享，信不信由你。但既然有價錢出，相信都唔會爭得遠，大家就先睹為快吧：
由價錢表見到，其中最低容量型號炒價最少，4.7吋16GB灰及銀色型號只比原價多出$112蚊咁大把，金色款就略為增至$212，最好炒的玫瑰金都只係多$412蚊。4.7吋128GB型號亦唔見得好價，玫瑰金色都只係比原價多出$212。
5.5吋的iPhone 6s Plus方面叫做好少少，16GB灰及銀都有$912，玫瑰金更有$1812多。128GB方面仲會再好少少，金銀灰比原價多$912至$1212，玫瑰金就多$1912。比起上年第一口價來講真係低左唔少，不過實際情況都要等到25號當日先知。投資買賣可升可跌，大家小心啦！
來源：先風數碼
